Dal toponim Ariis che, stant al NP, al è frecuent (il plui cognossût al è Àriis in comun di Rivignan, daûr al ven Àris in comun di Monfalcon; altris a puedin jessi microtoponims). Àriis al podarès sei il plurâl di àrie che al vûl dî “puarti” o “batût” (NP), o pûr, tal câs dai cognons, une forme notarîl in stîl latin. Cognons derivâts di microtoponims a son une vore comuns: Piazza, Pozzo, Beorchia, Bearzi, e v.i. Tal Cuatricent il cognon d’Ariis al jere presint a Liariis in comun di Davâr; vuê a son tancj a Raviei (1706 don Sebastiano Ariis del Sig. Giorgio q. Sebastiano e Giacoma nato a Raveo nel 1683) e si cjatin ancje a Udin e a Tavagnà. Tal volum “Carte del Vicariato foraneo di Gorto in Carnia” (Dell’Oste, 1999) o cjatìn chestis atestazions: 1415 Guargendo quondam Mathie de Argis (si à di leilu Ariis) de Ovaro, 1443 Iaconino filio Bartholomey de Argis de Ovaro; 1446 iuxta Mathiussium de Ariis de Ovaro; 1447 Mathiussio quondam Wargendi de Argis de Ovaro; 1483 Leonardo de Ariis quondam Nicolai de Pusteto de Rovoscleto de Monaio habitante in villa de Liariis. Tal 1362 Giovanni figlio di ser Miculo de Arges abitante in Castelluto (Biasutti). Chest cognon al è tratât plui insot in De Stefani 2003, 172-73.