Di Andreòl diminutîf dal non di persone Andree che, te forme Andriòl, al à origjinât il cognon Driòl. Presint a Udin (avonde difondût inaltrò in Italie). Intes Memorie su antiche case di Udine di G. B. Della Porta, par cure di V. Masutti (Udin 1984-1987), si lei: “Andrioli, Andreoli, Andreolli, Andreolo dal secul XIV a son presints a Vico Morcote sul Lât di Lugano in Svuizare, di dulà che in plui moments a son rivâts a Spilimberc, Midun e Udin. Dispès si menzonin tant che maestri murari. Tai secui XVII e XVIII in Friûl a operin cierts Luche e Francesc Andrioli, capomastri murari, ma in efiets a jerin calcolâts tant che vêrs architets e artiscj. Une vore di presi a son lis ristruturazions fatis di lôr su edificis impuartants di Udin, tant che il Domo, la Loze di Sant Zuan, i palaçs Arcivescovîl, Florio, Gorgo, Sacchia e altris".