Dal non di persone Andrea cuntun sufìs diminutîf o diminutîf cjarinatîf. Il non Andriol al è documentât in Cjargne fin dal secul XIII (Biasutti, 1956) cuant che Andriol di Noiarges (Noiariis dongje Sudri) al veve di paiâ al Cjapitul di Aquilee vi libras casei et xviiii denarios et i ovem et xii ova vel i Gallinam… (i = 1) e tal 1229 un abât Andriolo al jere piovano d’Invillino. Il cognon Andriolo al è documentât a Osôf fin dal 1595: in chel an, di fat, al compâr tal “Libro dei Matrimoni" di chê Plêf, Domina Cecilia nezza di mistro Cesare Andriollo Bombardiero nella fortezza di Osoppo. La stesse font nus informe de esistence dal non di persone Andriolo, ancje se al feminin: 1603 Andriolla fiolla di Piero dei Olivi. I Andriòlo osovans di cumò no son imparintâts cun chei citâts parsore parcè che a son rivâts da pît de Fuartece tai agns Cuarante dal Nûfcent. Andriòlo si cjate ancje a Gurize. La forme Andrioli si le cjate a Bresse di Cjampfuarmit (rivade di Midun ae fin dal Sîscent: 1697 Nadal Andrioli m.° Muraro) e a Udin; inte stesse citât ancje la forme ipercorete Andriollo (no vin informazions su la sô divignince, o savìn dome che al è carateristic di Semonzo in provincie di Trevîs e che di li, te metât dal Sietcent, al è emigrât tal comun di La Valle di Agordo) e la forme feminine Andriòla. Viodi ancje Andreòli.