Dal non de citât puliese. Presint a Udin e Pordenon.

Cognon presint a Monfalcon.

In origjin al varà segnât un che al faseve barii (non di mistîr), o al sarà stât un stranon riferît a cualchidun cuntune biele panze. Tal 1301 Liberale Barilli a Glemone (Corgnali). Il cognon si lu cjate a Udin, Gurize e Monfalcon. I Barile di Felet e cualchidun di Udin a son rivâts tai agns Cincuante di Jesi (AN).

Si sarà tratât di un non di mistîr riferît a cualchidun che al faseve barii. Analic, duncje, a Bottai, Bottèr e al todesc Fassbinder. Presint a Pordenon e a Udin.

Cognon venit che, però, al somee che al vegni di un tiermin dal dialet milanês che al vûl dî “cjaradôr" (Olivieri,1923). Par Soranzo 1996 no je  di escludi, però, la base gjermaniche bera, “ors", cetant slargjade te onomastiche medievâl, ipotesi che e fasarès jentrâ chest cognon inte grande schirie de tradizion gjermaniche. Di une altre opinion al è Bonifacio 1996b (che al rimarche la primogjeniture di chê spiegazion in Bonifacio 2010, 587), che par lui e podarès jessi “une variante pal passaç p/b di Parison, o ben che si trati di un alterât dal cognon ben cognossût Parisi, slargjât tal Nord de Italie, e di Parise, difondût tal  Centrisud de Italie, derivât de citât di Parîs, capitâl de France". Presint a Daçan e a Udin (specific di Maserà in provincie di Padue).

Presint a Paluce e a Trep di Cjargne (Zenodis): tal 1620 Franciscus q. Leonardi Baritusii de Zenodis (De Stefani 2003, 265). Intal Schedari Corgnali: 1365 Petrus dictus Baritus olim Abati de Pagnacho; 1530 Chiandit Barituz a Dimpeç. Intal Schedari Biasutti: 1643 Pietro di Bernardo q. Zuane Baritussi di Zenodis sposa Elisabetta de Cilia; 1716 Baritussi Pietro notaio di Zenodis di Treppo; 1726 Domenico Baretussi notaio da Zenodis. Al podarès tratâsi dal non di persone medievâl di divignince gjermaniche Baro, che i è stât zontât il sufìs diminutîf -ìt (o -èt che, deventât aton, al pues trasformâsi in -it) e il sufìs diminutîf cjarinatîf -ùs (viodi Baron, Barro, Barusso). Tal 1709 Pietro Baritussio assistente per il Quartiere di S. Pietro della Cargna (ASU Perusini 728.1).

Scrit ancje Barriviera. Cognon che si cjate ca e là tal Venit (documentât a Collalbrigo di Conean tal 1603) e a Daçan. Salacor variante dal venit balivèra o baivèra “glacere, o ben cjase o stanzie cence soreli e une vore frede" (Marcato, 1992) o pûr, e nus pâr plui probabil, di un sorenon formât sul venit antîc barrovière, barroèro “soldât a pît, sbîr" (dal francês antîc barrivier “cavalîr valorôs") (Dal Cin, 1997).