Il cognon Cedrón, come che al risulte dai libris de parochie di San Lenart al jere tipic dal comun di Drencje, massime tal paisut di Lase, ma culì si è estint za di timp. Dut câs, viers la fin dal Sîscent, al jere za rivât a Cueste di Vernassin (tal comun di San Pieri dai Sclavons) dulà che si lu cjate ancjemò vuê. Il so significât nol è clâr. Al podarès vignî dal sostantîf Čédra (une fate di pipe), cul sufìs incressitîf -ón, presint tai dialets slovens de Val dal Lusinç e de Val Trente. Duncje, in origjin il sorenon Čedrón al podeve volê dî "un chel al fume la pipe". Di chest cognon al è derivât un toponim: dongje Savogne e je la localitât di Cedron. Di fat, culì, si jere stabilide tai prins agns dal secul la famee di Cedron Luigi, che e vignive di Vernassin e che e à dât il non al puest (Zuanella, Dom, 18, 1994). Gianni Colledani mi sugjerìs la pussibilitât che al puedi vignî, par metatesi, di cerdón, che al è presint in plui documents cul significât di "cjaliâr".