O cognossìn plui puescj che si clamin Cjarària (une volte si lu scriveve Chiararia): tal comun di Cividât, ta chel di Forgjarie, a Cuâs (Reane)... Duncje, al è un cognon che al ven di un toponim. De Stefani 2003 al spieghe cussì: “Fameis cun chest non a son in plui comunitâts furlanis. In Cjargne i Chiararia a son documentâts almancul dal ’600 a Lauc, dulà che vuê a son rârs. Un Dominico de chararia de laucho al è citât ai 15 di Jugn dal 1613, e ai 22 di Mai dal 1645 si cjate Leonardo q. Pietro di Chiararia della Villa di Lauco ". Chest ricercjadôr al fevele di un toponim a Vile di Cjargne tal 1505: in pertnentis de villa in loco dicto in chiararia. Tal Schedari Biasutti: 1689 don Giovanni Domenico di Antonio Chiararia da Godia; 1730 Zuanne Chiararia e Gio Batta Turco suo compagno di Cerneglons; 1809 Angelo Chiararia di Osvaldo da Pantianicco domiciliato a Vissandone.