Al è tipic di Platischis, tal comun di Taipane, zone dulà che si fevele sloven. Cùful, par furlan, al vûl dî la scussute de ue dopo che e je svuedade de polpe. Al pues volê dî ancje di une “persone di stature basse” o “di aspiet patît”. Dut câs, no le à interpretade cussì chel studiôs pardabon brâf che al è stât G.B. Corgnali, che, te Patrie dal Friûl numar 3 dal 1951 al scriveve: ... cuant a Cùffolo o pues dîus che si trate di un cognon che nol è né furlan né sclâf: al è di urigjine gjermaniche come tancj altris nons cul acent su la tiarzultime silabe. Pensait: nujemancul che tal otâf secul dopo la vignude di Crist si fevelave a Solzpurch di un Cuffolo e di un Cuffulus. E chest mi risulte di documents tirâts fûr dal Förstemann, ch’al à mitude dongje une famose racolte di nons di persone e di lûc. Cuant al Friûl o pues dî che un Chuf o Johannes Cufus si lu cjate a Naarêt, disore Martignà, tor dal 1321-1326; che un Jacobus Chuffus o Jacum Cuf di Orçan al è ricuardât in cjartis udinêsis dal 1393-1410; che un Coffo, oltri che in Toscane, lu cjatìn ancje in Grupignan (Cividât) tor dai agn 1320-1327; che un Hendricus Cof al figure a Joaniz al principi dal 1400; che un Henricus condam Cufuloni de Murucio al comparìs dal 1364; che un Auliverius Cufeli al è a Travîs dal 1264. Un Cofulus, pari di un Marc cjaliâr, al jere a Udin intôr dal 1300. A Buje, dal 1260, si ricuarde un domini Cuffettis. A lis bassis o vin Cofegne, Cofegnanus, Cofignanus, ducj tal secul XIV. Tal Schedari Corgnali: 1222 et mansum de proprio registur per Odoricum Cuffulum de Fana; 1260 d.ni Cuffettis a Buie; 1321 Johannes Chuf (o Cufus) de Noyeredo de supra Martignaco; 1338 Piligrinus de Jamnico f. q. Cufanic de Viscono; 1364 Henrico q. Cufuloni de Murucio; 1393 Jacum Cuf (o Chuffus) d’Orzan; Cuffolo = Kaffol; sec. XIV Filippo Giacomo Kaffol a Gurize.