Al somearès che al vegni di curidôr “coridôr" tal sens di "ambient che al met in comunicazion plui stanziis de cjase" o tal sens di "atlete che al cor a pît"; al è plui probabil che al vegni di une peraule che si dopre pôc curadôr / curidôr “chel che al cure i interès legâi" come che si pues capî di une cjarte dai Acta Camerariorum Comunis di Cividât dal 1412: diey a Nichulau nodar curidor del pupilg... E je simpatiche, ma a chest pont no à fondament, la ipotesi che al sedi il non di un uciel, il Coridôr-clame-ploie, un trampolîr tipic te stagjon autunâl (NP). Al è presint a Flaiban.