Cognon nassût a Braulins (Trasaghis) e di li al è passât inte frazion di Pinade, tal comun di Osôf, che e je une piçule “colonie" braulinese in teritori osovan. Tal 1585 Valentin del Piz al jere hoste a Braulìns (ats dal Sant Ufici tal Archivi de Curie di Udin). A Glemone tal 1578 al ven batiât Simeon filius Antonii filii Simeonis del Piz de Braulins. Tal Libri dai Batisims de Plêf di Osôf, che Braulins i apartignive, si cjate, tant che santul, un Joannes del Piz tal 1624 e tal 1631. Il Piz / Piç, a Braulins, al è il non di une localitât: al è chel promontori piçul che si slungje sul Tiliment e che al è forât de strade par Bordan, dulà che al jere il cjistiel fat butâ jù dal patriarcje Bertrant tal 1336. Cussì al scriveve il Baldissera ta Il castello di Bragolino, 1985: “dai sgjâfs fats tal borc Piç mi è stât sigurât che juste chi a jerin i magazens e lis scudariis dai cjastelans di Braulins".