Cognon di Davai (Lauc). In mancjance di atestazions di archivi al è dificil dâ une spiegazion plausibile. Al podarès jessi un diminutîf di Garet, cun chest ultin che al ven di Goret, forme aferetiche di Gregoret, diminutîf di Gregorio. De Stefani 203, 116 al sugjerìs une scurtadure di (Mar)garettini, duncje dal non di femine Margherita. Intal Schedari Corgnali: 1313 Garetus de Resio a Trevîs; 1890 Garetto a Triest; 1938 Garettini 5 fameis a Davai (Lauc). Tal 1870 Giovanni Garettini al è zontât tes listis dai eletôrs dal Comun di Lauc (Lauco, 2003). Daûr des ricercjis che i stes Garettini di Davai a àn fat, a vignaressin des bandis dal lât di Iseo.