Cognon di Çopule (la famee dai Maccor e imigre a Çopule tor dal 1870 rivant di Dograve di San Zorç da la Richinvelde).
Dal pont di viste etimologjic, il cognon al rive dal non di persone cetant antîc Ermacora, sant e fondadôr de prime comunitât cristiane a Aquilee; a lui a son dedicadis la basiliche di Aquilee e tantis glesiis de regjon. La difusion di chest non e fo une vore marcade tal Imperi tart e te Ete di Mieç, soredut fra la int de campagne, tant che in cualchi localitât furlane macôr di non propri al è deventât non comun sinonim di “contadin".
A pet de dizion origjinarie Ermàcora, la forme atuâl Macôr e mostre diviers acidents linguistic fonetics tant che la pierdite de iniziâl Er-, la pierdite de finâl -a (forsit interpretazion falade tal sens feminin), la metatonie (moviment di acent) de -à- ae -ò- e, tal câs dal cognon di Çopule, ancje il dopleament de -c (N. Petris).
Viodi ancje Macór.