Cognon di Barcis e di Paluce, presint ancje a Pordenon. Tal 1613 Piero di Malattia a Andreis. Par Bongioanni 1928, al podarès rivâ dal non di persone Malachìa in graciis di un scambi, che lui al dîs al sedi frecuent, dal sun guturâl -ch- cul sun dentâl -t-. De Stefani 2003, 242 al risolf la cuistion: “des nestris ricercjis al ven fûr che i Malattia a cjapin il lôr non di un sorenon documentabil dal 1405, an li che un document al nomene Nicolao dicto Amalat de Paluza". No podìn nancje escludi che al sedi il sorenon Malìzia, scrit Malitia (1407 Stephano dicto Malitia q. Pauli di Reana) e, di chi, deformât in Malattia. Un câs analic al podarès jessi chel di Tarlao (viodi).