Il cognon Manzini al è tipic di Pulfar e di chenti si è difondût vie pes Vals dal Nadison. La forme origjinarie no je clare dal dut; di fat, e va tra Mancin, Mansin e Manzin (la forme atuâl Manzini si è stabilizade dome tal secul stât). Al è probabil che chest cognon al sedi rivât a Pulfar dal Friûl o dal Venit (ore presint al è tant difondût a Verone). Li de dogane di Pulfar a jerin in servizi, sot de Republiche di Vignesie, uficiâi publics che a vignivin di fûr e nol è di scartâ che, tra chescj, al sedi stât un Mancin o Manzin che si è po maridât e stabilît in maniere definitive culì. Chest cognon al podarès rivâ dal sostantîf mancìn o manzìn “çampin”, che al è presint sei tal furlan che tal venit (Zuanella, Dom, 20, 1994). No si lasse fûr une derivazion di “manç”, cul diminutîf -ìn; o ricuardìn ancje che Manzo al jere un vieri non di persone. A Cividât tal 1561 il m.° Iosepho Manzin al jere “vicin” de glesie di San Zuane de Senodochio. A Dartigne Manzìn al è stracognon di une famee Savonitti (Ceschia, 1998).