Cognon di Flavuigne in comun di Forgjarie. Si lu cjate ancje a Pinçan, San Denêl e Udin. Il progjenitôr flaugnàt (= di Flavuigne) al jere però un fari che al vignive di Clausêt (culì al reste il cognon Marescutti): mastro Antonio q. mastro Leonardo Mareschi da Clauzetto che za tal 1539 al jere a stâ a Flavuigne (Biasutti, 1976). So nevôt, ser Antonio, al ve une vite movimentade. Ai 7 di Setembar dal 1588 al provâ a diliberâ Gio. Batta Iogna, condanât in prison, biel che al vignive menât a Udin. Par chest al fo condanât ancje a cinc agns di bant di Flavuigne. Al le a stâ a San Denêl, li che si meteve a sunâ serenadis cu la cetre. 'Ndi vê di barufis, ma ancje la femine, Damma o Domenica, sûr dal nobil Carlo Natolini, che al maridà tal 1592. Cheste i puartà in dote il mulin di Albaçane... (Biasutti, 1976). Il cognon al à il sufìs -ésc(o) che al somee indicâ apartignince (in chest câs a une famee) o volê dî “fi di...” (al pâr che Francesco, in origjin, al volès dî “il fi di Franco”). Tal 1447 a Top:... silva recta per Simonem della Maresca. Un cognon innomenât che al à il stes sufìs al è Guareschi. La prime part, vâl a dî Mar-, e podarès jessi la forme aferetiche di un non di persone, par esempli es. Ademaro (o di un altri non che al finìs in -maro), ma o sin plui puartâts a pensâ che al sedi l'adietîf moro e, duncje, il cognon al larès metût adun al talian morésco.