Cognon carateristic di Puriessin tal comun di Cividât (1788 Joannes Baptista Margutti de Prugesimo; 1798 fil. Josephi Margut de Azida; 1798 Antonio Margutto de cararia sposa Maria Scrignar di Azzida) di dulà che si è slargjât, ma no in maniere incisive, tai paîs dongje di Sanguarç e di Azide. Par Zuanella (Dom, 5, 1966), al ven dal non di sante (e di femine) “Margherita" che, par furlan, si dîs Margarite, ma ancje Marghe, e a cheste ultime forme al sarès stât tacât il sufìs diminutîf -ùt. Mancjant atestazions plui antighis, no si sintìn di escludi un origjinari Marcùtti, di Marcùt, diminutîf di Marc. Tal 1586 Michael Marghuttus della Vicinia di Brazzano (ASU CRS 139/1).