Mánig /Mánič al è un cognon tipic di Tei (comun di San Pieri dai Sclavons) e al jere presint za sul tacâ dal 1600. In Corgnali: 1792 Manigh a Cividât; 1802 Manigh a San Pieri dai Sclavons. Merkù 1982 al pense che il cognon al sedi jessût fûr dal verp sloven méti, mánem e che in origjin al indicàs une persone che e specolave il mei. Zuanella (Dom, 18, 1994) al propon une altre ipotesi. Par chest autôr il cognon al podarès jessi derivât dal etnic Romanus che al à creât diviers cognons talians e furlans dal gjenar Romanìn, Romanello, Romanutto, e v.i. Sul imprin chescj nons a jerin doprâts par indicâ personis di origjin latine o neolatine (furlane), cuasi par distinguilis di altris personis che a vivevin daprûf e a jerin di etnie divierse, par esempli sclave (slovene). Si po pensâ ancje a toponims come Romans e Sclavons. Zuanella nol gjave fûr che il non Romàn al sedi jentrât dentri ancje tes Vals dal Nadison. De forme aferetiche Man e cu la formante -ič al è po nassût il cognon Mánič, scrit Manig, che si è tignût cont fin al dì di vuê. Viodi ancje Màgnis. Tal 1694 Andrea q. Mattia Manigh del Peijo di Ponteaco citato in Fraterna SS.mo Rosario di S. Pietro Schiavoni (ASU CRS 448).