Cognon tipic di Pecinie in comun di Savogne (1614 Iuri Marciz de Pecne; 1618 Simon Marciz de Pecne; 1619 Simon Marchig de Pegne; 1625 Machor Marchig de Sau(o)gna); di ca al è vignût jù adore a Savogne, li che al è presint in dì di vuê. Al ven, cu la formante patronimiche slovene -ič, dal agjionim Marcus “Marc” e, in origjin, al indicave “il fi di Marc”. Chest cognon al è presint ancje te Val mezane dal Lusinç: une frazion di Seniški breg, su la rive di çampe dal flum, si clame Markiči, intant che sul teritori di Kambreško (rive di drete) al è il paisut di Markiči. Ducj i doi i paîs a àn cjapât il non dal cognon Markič, tipic dal puest. Al è di marcâ che proprit dal paisut di Markiči, logât tal teritori di Kambreško, al è rivât te Val di San Lenart, e di precîs a Oblize (tal 1892), il cognon Marchig. Cussì al scriveve bons. Angelo Cracina: “I Marchig di Oblize (Nagoristi) a son oriunts de frazion di Markiči, parochie di Marijno Celje, comun di Cjanâl dal Lusinç. Di fat, ai 27 di Avrîl dal 1892 il siôr Markič Pietro di Andrea e di Melinik Maria di Markiči al maridà la signorine Primosig Teresa di Oblize (Cfr. Rino Fortunato Marchig sacerdote novello, Oblize di Stregne, ai 29 di Jugn dal 1964, p. 6). Il Cracina al cjape note sul librut a pene nomenât che il cognon Marchig al jere za presint tal 1600 a Seuze di Grimac (1636 Paulus filius Stephani Marchig de Seuza Libris dai batisims di San Lenart), ma che te antighe parochie di San Lenart al è sparît tor dal 1700. Il cognon al è documentât te Plêf di Cjaurêt za sul tacâ dal 1600 (1625 filius Melichari Marchig de Loch su plebe Caporeti - Libris dai matrimonis di San Pieri) (Zuanella, Dom, 9, 1999).