De Campo 2003, 69 al segnale il batisim di Giovanni de Balzan a Trave di Lauc tal 1578, uniche atestazion di chest cognon in chê localitât. O stimìn che si trati di un erôr di leture o di trascrizion par  Balzar, cognon che al à plui documentazion: 1493 Gaspare q. Leonardo de Balzar di Trava (AB), 1516 Leonardo q. Gaspare Balzario di Trava (AB), 1581 Gio. de Balzar giurato di Trava (segnalazions di G. Fantini in De Campo 2003, 110). Balzan / Balzano si podarà, forsit, colegâ al talian balzana o ben, par Cerruti, “guarnizion che si interpon bande la estremitât des viestis, blancjarie e similis". In merit al adietîf balzano, “si lu dîs dai cjavai che a àn i pîts segnâts di blanc e il mantel di un altri colôr" (ibidem). Il significât di “balçan, stramp" al dipent dal caratar cognossût dal cjaval balçan (DELI) e, stant che chê acezion e je documentade almancul dal Cuatricent, o calcolìn plausibil che e puedi vê concorût a formâ il cognon. Dutis trê lis formis cognominâls si lis cjate a Udin. Balzan al è cognon belumat, ma si lu cjate ancje inaltrò tal Venit; Balzani al è romagnûl e slargjât in maniere varie di altris bandis; Balzano al è massime napoletan e dal Sud (CI 143).