Cognon di Cjasteons di Çopule. Tal 1767 Antonio e Cugini Barabassi, fittuali Scuola di S. Marco e Ilario di Castions di Porzia (ASU CRS 42).

Come Barachino (viodi). La forme Baracchini si le cjate massime a Buie (par Biasutti culì e je frecuente dal Cuatricent: 1431 Subeta uxor Mucii Barachini; 1471 Barachino q. Daniele Zoioso; chi ancje il toponim Braide Barachine: aratîf a man çampe tra Ursinins Piçul e Avile, prime di rivâ li des primis cjasis di cheste ultime localitât) e, po dopo, a Maian. La forme Baracchino si le cjate a Maian (chi il toponim Cjase Baracchino te mape IGM).

Salacor dal paîs di Baracêt (talian Barazzetto, in comun di Cosean). Al vûl dî “gredei di baraçs"; nol è di escludi, duncje, che ae fonde di chest cognon al puedi jessi ancje un microtoponim (par esempli, tal 1455 a Grac di Rigulât in loco dicto Barazeit de supra via, juxta viam per quam itur in Gorto; tal 1462 a Buie uno prato sito in pertinentijis de Buya in loco vocato Baraçeto che cuasi dal sigûr al è il Baracêt di vuê, une localitât tra Batafier di Tombe e Andreuce). Cognon presint massime a Codroip e, po dopo, a Udin, Murùs e Pordenon. Intal Schedari Biasutti o cjatìn che i Baracetti a son cetancj a Rivolt dal Cuatricent.

Salacor nol à nuie a ce viodi cu lis barachis; o vevin pensât a une variante di berechin “birbant, svelt" che (NP), dit di persone adulte, al vâl tant che “maliziôs, di pocje fede". Intal NA si cjate però un Matheus Barachinus e chest al podarès fâ colâ cheste ipotesi, ancje parcè che nol risulte che la peraule berechin e fos cognossude tal furlan dal Tresinte. Si podarès tratâ, alore, di un sorenon (che no capìn il sens), o di un non di persone medievâl (forsit di Baracco, che al ven dal gjermanic Baro). Intal 1431, tra i membris de confraternite di Sante Marie di Malotul di Buie si cjate Subeta uxor Mucii Barachini (a Buie ancje il toponim Braide Barachine). Il cognon al è presint a Maian (chi il toponim Cjase Baracchino inte mape IGM). Viôt ancje Baracchini.

Par N. Petris al ven di une forme base Baratta/Baratto/Baratti cun sufìs venetizant -èl di valôr diminutîf (ma cuntune sfumadure ironiche che si dopre spes par indicâ une “berechinade tipiche dai fruts cence dissipline") e lenizion dal -t- in -d-, ancje chê tipiche dal venit. In origjin al pues jessi stât, duncje, un non o sorenon di mistîr leât cul verp baratâ “scambiâ marcjanziis e robis variis" e, in ciertis situazions, al pues jessi passât a indicâ no dome “cui che al barate ratatuiis", ma ancje un “funzionari public disonest, corot, che al oten profits in maniere ilecite dal esercizi des funzions che i son stadis assegnadis". Par CI 147 cheste spiegazion no je justificade dal pont di viste fonetic e il cognon al vignarès di un toponim analic (derivât di baro “boscam, arbossit") atestât intal Venit e in Lombardie. La forme Baradel si le cjate a Gurize, San Ganzian, Fare, San Stin, Cordenons (e inte provincie di Vignesie); Baradello a Roncjis di Tisane.

Dal talian arcaic baratta “contese, contrast, barafuse", deventât sorenon par segnâ une persone barufante. O viôt un dai nons/sorenons venits che a saltinfûr in -èla, masculins cundut de vocâl -a, tant che Batistèla, Zanèla, e v.i. (Rapelli, 1995). Presint a Pordenon (avonde frecuent te provincie di Rovigo e si lu cjate in altris lûcs dal Venit).

Di baratto “scambi, compravendite". Dutis dôs lis formis si lis cjate a Pordenon.

Al à ae fonde il tiermin baratto, o ben scambi, compravendite. Dutis dôs lis formis si lis cjate a Udin. Barattin al è cognon dal Alpago e avonde frecuent a Oderzo; Barattini al è frecuent tal comun di Carrara e si lu cjate in tantis localitâts de Italie setentrionâl.

Par Dal Cin (Susegana) al podarès vignî di un sorenon formât sul furlan baraç, o ben sterp plen di spinis. Il cognon, in realtât, al somee plui venit che furlan: inte nestre regjon si cjate massime inte venetofone Sacîl (a pene rapresentât a Udin) e, pal rest, al è logât inte zone di Conean. No escludìn une derivazion dal non di persone medievâl Baro (viôt Baron, Barone, Barro, Barusso). Secont CI 149 al sarès di colegâ al toponim Baraz (di baro “boscam, arbossit") presint inte aree di Conean. Intal Schedari Corgnali: 1332 Paganolo Barazza di Mediolano a Udin. Un Aloisio Baraza al è documentât intal 1505 a Colle Umberto (TV).

Come Baracetti (viodi). Presint a Gurize.

Al è un diminutîf in -ut dal furlan baraç, che al è un sterp plen di spinis (intal 1405 a Glemone Item expendi in quatuor curribus barazorum a faciendam barazatam super dicta maseria, soldos quinquaginta). In origjin si sarà tratât di un microtoponim, ma intal 1300 Barazuttum al è documentât tant che non di persone a Bean dal Teritori (comun di San Ganzian), e intal 1319 Barazzutti Pietro f. di Venuto calz. abit. Gemona affitta a Nic. di Sesto q. Gio. di Avasinis (o lei ancje Levasinis) terra in Avasinis retta da Cunsio figlio di Baraço de Avasinis (Biasutti): di chi si podarès dedusi che Barazzutti / Baraçut al podès jessi patronimic dal non di persone Baraç, forsit di colegâ, plui che a baraç tal sens di sterp spinôs, al non medievâl Baro (viôt Barro, Barón, Barusso, e v.i.). Chest cognon al somee carateristic di Mene in comun di Cjavaç (1522 Floriano Barazuti; 1579 Leonardus filius Nicolai et Ursulae de Barazuttis de Menna) e di Forgjarie. Presint ancje a Udin, Tumieç, Vît, Glemone (3 fameis intal 1929), San Denêl, Buie. Intal 1592 la del sfoio del Barazutto a Sante Marie la Lungje (chi intal Sîscent il cognon Barazutto). A Buie il toponim Baraçut, cjasis di Urbignà, a diestre e a çampe de vie par Zeà (Calligaro, 1925).

Cognon di Mosse. Dal furlan baraç, o ben sterp plen di spinis, o dal non medievâl di divignince gjermaniche Baro cu la zonte dal sufìs -àç / -àz. Tal 1330 Petrus dictus Baracius filius Bayuçe a Glemone (Corgnali).