Il cognon Bordón, nassût sul confin linguistic furlan sloven, al è tipic dal comun di Prepot e, di chi, si è slargjât te val di San Lenart e su la rive a man çampe dal Judri (tal 1602 al jere presint a Tribil Disore tal comun di Stregne). Po dopo al è rivât a Cividât e in altris zonis dal Friûl. Intal Schedari Corgnali: 1327 Bordonem preconem de Utino; 1500 Bordon presenti a Montina ed a Cividale. Al è un cognon cuntune probabile origjin romaniche. P. Merkù lu fâs derivâ, cun prudence, dal tiermin musicâl, presint tal furlan e in cualchi dialet talian, bordón “cuarde, bas dal liût” o dal talian bordóne “cane di baghe”. In chest câs il significât origjinari al sarès “sunadôr di bordon”. No si pues, però, lassâ di bande il sostantîf talian bordóne (il baston dal pelegrin o robis di chê fate). In chest câs al varès definît un pelegrin (Zuanella, Dom, 11, 1989; Merkù, 1994). No si pues scartâ nancje un incressitîf dal non Bordo che si cjate tai romançs cavalerescs (cavalîr de Taule Taronde; cun Galàs e Percival al è destinât a puartâ insom la imprese dal Graal. Al passe i ultins agns intun romitaç cun Lancelot e altris cavalîrs). Tal Tresinte Bordonus al jere sigûr un non o un sorenon di persone. Tal Març dal 1331, di fat, i contadins di Possec a fasin riviel cuintri dal rapresentant de curie patriarcjâl che al vûl pignorâ cualchi trop: “dictus Bordonus preco per sacramentum sui oficii dixit ac retulit, quod fuerunt homines dicte ville circa L aut XXXVI et mulieres circa XII cum lapidibus et violenter, armata manu, acceperunt dicta quinque armenta... "" (Bianchi, Documenti, n° 662). Par Bonifacio 1996b al è probabil che al sedi une derivazion dal non di persone Bordo, e di chest Bordon al sarès il câs oblicui, e che al rimonti al gjermanic Herbordo (1318 Herbordo pellipario Civitatensi).