Al è probabil che al vegni dal non di persone che si doprave une volte Botto. Tal 1327 un Botta filio domini Bruni Rogerii de Salto (Moro, 1991). Tal 1512 il mestri muredôr Boto al veve lavorât pai mûrs perimetrâi de glesie di Sante Marie des Graciis di Udin (Bonoris, 1978); tal Archivi Roia al è un Sebastiano Botho (duncje, un cognon) parocho S. Georgii de Claut. No escludìn che chest cognon si puedi identificâ cul gjermanic Boto, variante di Bodo, forme scurtade di Bodomir e Bodowin; la prime part, o sedi Bodo-, e varès di volê dî “messazîr, mes". Cussì no podìn scartâ la ipotesi che e sedi une forme aferetiche: il non Sibotho al è tal Necrologium monasterii Rosacensis scrit tal 1250 e Marabotum al è un non documentât a Glemone tal 1405. Par Violi 1996, il non medievâl di persone Bottus al podarès jessi deventât un cognon documentât te zone di Modena dal 1139, origjinât dal latin medi buttis, caratel, sorenon par dî di une persone cracule e gruesse. Tal Archivi Biasutti a son un pâr di atestazions che a podaressin fâ pensâ a un ipocoristic dal non "Bartolomeo": 1479 m.° Bartolomeo carpentiere di Chiavriis detto Boto, 1538 Bartolomeo detto Botto q. Nic. Aita di Basegliuta. Tal Schedari Corgnali e je ancje une altre atestazion che e conferme cheste ipotesi: 1327 Bertholotto dicto Botto notaio de Utino. Cognon tipic di Cjistilîr (Pagnà): tal Schedari Biasutti o viodìn che al è difondût a Cjistilîr tal Cuatricent, par esempli tal 1480 Nicolò q. Giovanni Both (ancje Bot, Botho, Botto) da Castellerio assume livello verso la chiesa di S. Giorgio di Pagnacco; al è ancje a Udin, Tavagnà e Tresesin.

Forsit al ven dal non antîc di persone Botto (viodi Botto). O pûr de peraule venite bòtolo che al vûl dî il scarondul dal sorc, duncje, i sorenons a puedin vignî di chi. Bòtolo, in venit, al è ancje il non di un pes, forsit plui cognossût come cievolo. Al è a Udin.

Di un incressitîf di bótte, par dî di cualchidun che al vendeve o che al faseve caratei; o di bottóne, par indicâ cui che al faseve o al vendeve botons. Nol è di escludi un incressitîf dal non antîc di persone Botto. Al è presint a Osôf (al ven de Toscane).

Come Bottòs (viodi). Al è a Pordenon, Puart, San Stin, Cordenons.

Come Bottòs (viodi), cu la zonte dal sufìs diminutîf. Al è a Daçan.

Salacor al à la stesse divignince di Buttò (viodi). Presint a Palaçûl e a Tisane.

Al è probabil che al vegni dal non di persone che si doprave une volte Botto, cu la zonte dal sufìs -òs come in Bertòs, Micòs, Linòs, e vie indevant (viodi Botto). Cognon avonde presint a Pasian di Pordenon, Daçan, Pordenon, Pravisdomini, San Vît; al è a Cjons, Cordenons, Vildiflum, Prate, Gruâr.