Al è probabil che al vegni dal non antîc di persone But o Bot (viodi Botto e Butti). Cheste forme cul acent e podarès vignî di un incressitîf (Buttón) o di Buttòs, e chest di But, o Bot, cu la zonte dal sufìs -òs (come tal cognon Bottòs). Cognon tipic di Roncjis di Tisane; al è presint a Pucinie, Tisane, Lignan, Muçane, Palme, Udin.

Cognon tipic de Val Resie, presint in dutis lis frazions; al è ancje a Gurize, Palme, Rivignan, Sante Marie la Lungje, Çopule; in Slovenie al è a Tulmin e a Nova Gorica te variante Butolo. Cu la forme cognominâl italianizade te grafie, al è in relazion cul sostantf sloven bútelj che si riferìs a une cualitât di ciespe e a une specie di miluç grues, al vûl dî ancje di une persone cul "cjâf grues", duncje testarde, grese, bon di nuie. (Merkù, 1981). Se al ves une formazion dal furlan (si lu cjate ancje a Udin, Cjassà, Pordenon, Tarcint) o pensaressin a bùtul che al vûl dî "gjeme" o "butul, menade" o ancje "butul di rose che no si è ancjemò viert": o vin cjatât Bùtul come sorenon simpatic a Dardâc e a Glemone. Infin, no podìn dismenteâ il non di persone antîc But (tal 1331 un Butulus hospes de Utino) che, almancul in cualchi câs, al podarès jessi un ipocoristic di Blasùt, diminutîf di Blâs “Biagio". Tal Tresinte (?) a Muimans iuxta pratum Nicolai Butuli; tal 1366 unum campum Nicolussii Buttuli (Ziani, 1999); tal 1423 a Cividât Culau di Blas di Butul (Vicario, 2000). Tal Schedari Biasutti al è documentât a Ruvigne (1544 Mattia q. Domenico Butul de Ragogna; 1545 Lorenzo e Filippo q. Butulo di Muris) e Tal Sietcent a Stulvize di Resie (1756 Francesco di Domenico q. Zuane q. Domenico q. Biasio Buttolo da Stolvizza sposa Valentina Lettig; 1761 Maria di Antonio q. Zuane Buttolo da Stolvizza sposa Antonio Letig). Tal Schedari Corgnali: 1320 Buthuli a Cividât; 1330 Butto filio Federici calcificis a Resie; 1328 Dominicus q. Butule in Istrie; 1440 Iohanne fabro del butulìn de Stegnimbergo; 1468 Magister Buthulus correarius a Udin; 1471 Michael f. Butulini de Sequals; 1579 Buthul Thomas a Stulvize. A Buie Bùtul (de famee Bùttolo detta Roseàn, o sedi “che al ven di Resie") al è toponim: cjase, aratîf e ort a man drete su la carabile Ursinis Grant Colorêt, dopo de cjase dai Piemonts (Calligaro, 1925). Bùtul al è sorenon di famee a Osôf tra i Menis e a Glemone tra i Serafins.