Al ven dal venit cocco “pupil”, o dal furlan coc (viodiCoccolo). Par De Felice 1978 “al è derivât di plui nons e sorenons deventâts cognons, za documentâts e comuns tal secul XII (Coccus, Cocculus, e v.i.), che tes diviersis regjons a àn vût derivazions e procès di formazion diferents, che si incrosin tra d lôr e dispès no si rivin plui a dicerni”. Il stes autôr al pense che une origjin probabile e sedi cocco, une peraule familiâr onomatopeiche che e vûl dî “ûf”, ma che al è ancje un cjarinatîf par frutins o personis che si à a cûr. Tal 1447 a Davaste (comun di Davâr) iuxta pratum quondam leonardi dicti Coch. Tal 1461, a Rivote (Rivis Darcjan) al è segnât un teren alias recte per Joane Coch nunc in pustota (Venuti, 1998). Tal Schedari Corgnali: 1406 Ser Joh. de Cochis a Pordenone; 1410 Andrea molendinario filio Dominici Cochis de Basaldella; 1426 Chochis di deto vilo a Grupignan; 1639 Domenego Cochis a Prepot. Al è presint a Gurize e a Udin (al è plui difondût te zone di Vicence).

Cognon di Glemone (4 fameis tal 1929) presint culì de fin dal Cuatricent: tal 1490 il batisim di Nicholaus filius Dominici Chochon, tal 1501 chel di Elena fiola di Zuan Cocon, tal 1547 chel di Zuannina fiola de mistro Chulau Chocon, tal 1590 e je la volte di Johannes Baptista filius Francisci Cocconi dicti Bayseri (Decio Tomat, informazion personâl). Tal 1656 Domenego Cocono figlio di Zuanne di Gemona, teste (ASU CRS 231/2). Tal 1769 don Francesco Cocconi da Gemona va cappellano nella diocesi di Adria (Biasutti). Al podarès vignî di cocón, une peraule cun plui significâts. Al podarès jessi un sinonim di cjalcón “stropul, tapon di len par botis o brentiei”, o pûr volê dî “pete di cjavei sul cjâf des feminis” (NP). Dut câs no podìn trascurâ la peraule veneziane cocón “tartaiot” che si preste une vore a fâ di sorenon e duncje di cognon. Simpri a Glemone Cocón al è (o al jere) ancje il stracognon di une famee Bonitti (Ce fastu? n. 7, 1929). A Ospedâl (Glemone) al è il “Mulino Cocconi”, tal mieç dal centri abitât dal Borc dal Mulin di Ospedâl.

Còcula e Coculussa une volte in Friûl a jerin nons di femine une vore biei. Al pues stâi che Còcul al fos la version masculine. Còcule, ancje tal furlan di vuê e je la pome e semence dal cocolâr (sient. Juglans regia). Còc al vûl dî “ûf” e Còcul al podarès jessi la sô forme diminutive. Cussì te lenghe antighe di Monài (vuê Ravasclêt): Mènio, sul desc, sbat ju cocs par fâ las frìtulos e las sòpos indoràdos. Infin, Coc, al è il non di un uciel (par talian occhione). Viodi ancje Cocco. Il NA al ripuarte un Chuchulussius molendinarius (mulinâr) tal 1382; pôcs agns dopo, a Vençon al è un Chuchuluz Scorset (Wolf, 1874), in terra Choculi tal 1323 a Davâr e un Bertolotto dicto Choculo tal 1342 a Davaste di Davâr (Dell’Oste, 1999). A Nimis tal 1431 Tomaso detto Cocul q. Odorico Cozette. A San Lurinç di Sedean Potentiana filia Coculi (SL). A Udin a son chestis atestazions: 1282 Iohanni dicto Cuculuça (Moro, 1991); 1425 Çuanine dete Chocule; 1427 Zuanine Chocule; 1433 Çuanina fiola che fo di Zuvan Chocula; 1439 Pidrusse sur de Cocollate (Vicario, 2001, b). Tal Schedari Corgnali: 1271 Coculo de Rogia a Glemone; 1278 terra Coculi a Vençon; 1278 Coculus a Montenârs; 1287 Cocolo q. Nicolai Remoti de Paderno; 1294 Coculo de Magnano; 1308 Coculi (o Coculus) a Cividât; 1310 Coculus et fratres de Campoformio; 1341 Coculus de Aupa; 1341 Coculo de Laybaco; 1432 Daniel q. Gasparini vocatus Chocul de Bagnara; 1350 Justo dicto Chochulo de Rumignano a Udin; 1356 Paulo dicto Cuochul de Santo Vidoto; 1362 possidet Chocula ad Atimis; 1426 Michael Chochulan a Ribis; 1426 q. Chochuli a San Denêl; 1426 Petro Chochulino a Martignà. Chest cognon si cjate a Felet, Udin, San Zorç di Noiâr, Gardiscje, Pordenon, San Martin di Voleson, Pagnà, Gurize, Cordenons, San Vît dal Tiliment, Cividât, Glemone (in domo Francisci Coculi tal 1390; Maria Clara fiola di Tomat Cocul nel 1549), Manzan, Remanzâs, Cint. Te tabele IGM Ruvigne, al è il toponim Coccoli.