Al ven di Colòdo, forme aferetiche di Nicolòdo, variante di Nicòla. Tal câs di Gurize, al podarès jessi ancje la italianizazion dal sloven Collorig. Il cognon Collodo si cjate a Vignesie, Mogliano Veneto, Padue, San Donà di Piave. Tal 1957 al mûr il poete liric Giuseppe Collodi, nassût a Cormons tal 1878. Prime de “redenzion”, il so cognon al jere “Collorig” (Nazzi, 1992).

Diminutîf dialetâl venit di une forme aferetiche di Nicolodo, variante di Nicola. Al è difondût a San Pietro di Feletto e a Conean (provincie di Tevîs); te nestre regjon al è a Pasian di Pordenon e a Udin.

Diminutîf di une forme aferetiche di Nicolodo, variante di Nicola. Cognon de provincie di Trevîs; al è presint a Sacîl, Cjanive e ca e là te zone di Pordenon. Tal Sietcent a jerin i Collodetto presints a Frate (Cjanive) (Luchini, 1997).

Al ven di un dai trê paîs che si clamin Colloredo / Colorêt (dal latin coryletum “boscut di noglârs”): Colorêt di Montalban, Colorêt di Prât, Colorêt di Sufumberc (al pues jessi ancje un microtoponim). Si cjate a Buri, Cordovât, Sedean, Udin. Tal 1598 a Cividât Leonardo Coloredo official. Il Schedari Biasutti al à tant materiâl su chest cognon. O ripuartìn dome cualchi atestazion: 1349 d.no Bernardo de Colloredo q. d.ni Guielmi de Venzono, posssedeva parte del castello di Brazaco di Sotto; 1351 fra Mattiusso di Colloredo; 1415 nob. Nicolò Colloredo, sua moglie Blasiola possedeva beni affittati a Siaio, Zenodis, Treppo, Paluzza, Pedreto di Piano, Casteons, Naunina, e vie indenant; 1438 Ser Antonio de Colloredo q. Ser Fidriucio notaio in S. Daniele; 1469 nob. Colusia Colloredo ved. q. notaio Giovanni di Valvasone; 1470 Lodovico Colloredo gastaldo di Cargna; 1489 nob. Girolamo Colloredo q. Giovanni di Colloredo di Monte Albano capitano di Gemona; 1549 nob. Guglielmo Colloredo abitante in Ribis in lite per il quartese con don Giovanni Napolitano (o Partenopeo) parroco di Reana.

Al è un cognon tipic di Prepot (1520 Matia Kolar de Prapot; 1547 Primos Colorig de Crauoret; 1550 Gregor filius Kolarijtz de Prapott). Di culì al è emigrât tai paîs dongje e dopo ancje te planure furlane. Tal Schedari Corgnali: 1639 Zuan Colorigh de Prepot; 1700 Collarigh a Gjian; 1792 Collerigh (o Collorigh) a Cividât; 1877 Collerig a Gurize. Al è un cognon tipic sloven derivât, zontant il patronimic -ič (scrit -ig), dal non di mistîr kolar (la prime atestazion e je Kolar!) che al indiche un fabricant di ruedis (come il cognon furlan Rodàro) e/o altris parts di len dal cjar. Il cognon Kolar al è presint, dongje de forme patronimiche plui rare Kolarič, in dut il teritori de Republiche di Slovenie e cheste difusion e dimostre cetant difondût che al jere il mistîr dal kolar cuant che i traspuarts di marcjanzie si fasevin dome midiant di cjars tirâts di bûs o di cjavai (Zuanella, Dom, 13, 2000). A Ugovize e Tarvis si cjate la grafie todescje Kolleritsch.

Al è un dai tancj derivâts dal non di persone Nicolò che al veve lis variantis Colào (furlan Culàu) e Colavo; culì al è cul sufìs dispreseatîf -àt. Tal Liber anniversariorum dal Cjapitul di Concuardie si à une Menia detta Culavata (Stival, 1989). Tal Schedari Corgnali: 1540 Valentino Colavratti a Teôr; 1586 Vincentius Colavattus (ancje Colovatto) a Percût. La forme Collovati e je tipiche di Teôr; si le cjate ancje a Monfalcon e a Pordenon. Collovatti al è a Monfalcon.

Di Colào / Colàvo “Nicolò" cu la zonte dal sufìs patronimic sloven -ič. Nol è di escludi un fal di trascrizion par Collorig (viodi). Tal 1725 Mattio Colovich (ancje Mattio Collavigh o Collarigh) cameraro Fraterna SS.mo Rosario di Ipplis (ASU CRS 248).

Come Collavìn e Collavini (viodi). Al è il cognon plui difondût a Pramaiôr (Marcato, 1995); si lu cjate ancje a Pordenon.