Dutis dôs lis formis a son tipichis dai Fors Savorgnans dulà che tal 1308, Giovanni Colman al vendeve par 28 solts venits a Giacomo e Donato di Cente di Vîc doi tocs di prât (De Santa, 1899). Une ipotesi che o podaressin fâ e je che chest cognon al vegni dal non Carlomanno. Chest al è documentât a For Disore tal 1306, quant che Carlomanno di Vîc al vent par 28 solts a Revardo un toc di tiere (De Santa, 1899). A For Disore il toponim in Colormàn. Dut câs, no si à di trascurâ il todesc Kohlenmann “cjarbonâr, vendidôr di cjarbon” e visìnsi che par Merkù 1995, il cognon Kollmann al è difondût in dut il teritori sloven e al derivarès dal non sloven dal sant Columbanus (par talian Colombano), che dopo al è deventât un non di persone. Di fat za Olivieri 1923 al pensave che chest cognon al derivàs dal non dal sant Colman, zontant che al è un non frecuent te Ingletiere. La forme Colmàn si le cjate a For Disore (1760 Sebastiano Colman di Antonio era andato a Treviso a imparare l’arte del marangon), a Claut e Davâr; Colmano a For Disot (1464 Odorico Colman; 1693 don Odorico Colmano di Giovanni), ma ancje a Luvinà e Feletan intal comun di Tresesin. Tal Schedari Corgnali: 1198 Colomanus de Castel Lavazzo; 1292 Colomanus de S. Stephano; 1412 Leonardum Golmani a Buie; 1471 Culmano q. Danielis a Vivâr; 1491 Culmanno filio Nicolai Blasy de Plebe Aviani. Tal 1783 Rev. Lorenzo Colman di Romans Stato Austriaco Capellano del Co. Antonio Antonini (ACAU 732/1).