Diminutîf di croàto “che al è a stâ in Cravuazie". Dutis dôs lis formis si cjatin a Udin (1767 don Giovanni Croatino). Tal Schedari Corgnali: 1500 Croattino (o Crovattino) te zone di Cividât; 1541 Croatinum de Cavallico; 1554 Zuan Crovattin de Chiavallì; 1564 Dominico q. Joh. Croatinj de Caballico.

Al vûl dî “cravuat, che al ven de Cravuazie”. Une volte si metevin une vore di doplis (ipercoretisim). Si cjate a Udin, Tarcin, Remanzâs, Atimis, Magnan. Tal Schedari Corgnali: 1382 Dominicus dictus Cravattus q. Simonis magus a Udin; 1401 Giovanni Crovato Capit. di Tarcento; 1488 magister Benedictus Sartor Cargnellus filius Sabadini Croat de Avaglio habit. in Adeglacho; 1489 Lenart Crovat a Braçan; 1491 Dominico Croatto de Solimbergo; 1500 Croatto presint te zone di Cividât; 1504 in Area habit. Antonij Croat, -tti a Breçan; 1533 campum m.° Lenardi et fratrem del Croat a Udin; 1550 Benedetto Crovatto a Davai; 1564 Ser Marcho Croato a Nimis; 1606 Biasio Crovat a Manià; 1929 Crovato 29 fameis a Secuals. Tal 1598 a Cividât Francesco Croatto beccaro.

Dal non di persone Croce; o pûr, in origjin, al voleve dî di personis che a jerin a stâ dongje di une crôs. Presint a Udin. A Monfalcon te forme Croci.

Salacor al ven de peraule venite croda “crete, clapon”. Duncje, in origjin al à di jessi stât un microtoponim. Tal 1526 iuxta Colaum del Croda a Marsuris di Porcia (Corgnali); tal 1713 Ser Zuanne q. Bastian Croda de Aviano (Biasutti). Cognon di Stevenà di Cjanive: 1572 presint a Stevenà Piero Zambòn dit Croda (o della Croda) che tal 1582 al maride Francesca Chiaradia (Luchini, 1997).

A prin viodi al somearès une variante di grop e duncje al sarès compagn di cognons come Grop e Groppo (viodi). Però, i documents dal Cinccent no somearessin dâ reson a cheste spiegazion: 1506 joannes Chroppe; 1558 Zamparius nepos qm. Leonardi Croppe (Archivi parochiâl di San Scjefin, tal comun di Sante Marie la Lungje): pluitost al somearès che al vegni di grope, ma ricuardìnsi che cun gròpule si pues volê dî ancje “ernie”. O pûr al è un sorenon fat sul todesc Kropf, che une volte al jere ancje Krop, “gose”. Al è presint a Tresesin, Reane, Cividât, Felet tal comun di Tavagnà.

Salacor al è il diminutîf di Crosèra (viodi). Al è presint a Danon e a San Stin (Corbolon). Tal 1745 Girolamo Crosariol, gastaldo della Scuola della B.V. di Santo Stino di Livenza (ASU CRS 449).

Al ven di une peraule venite che e vûl dî “camisolin, crosat” (Olivieri, 1923). Boerio al dîs: vestimento da uomo che cuopre il busto, come giubbone o camiciuola. A Revine, dongje Cenede, crosàt al vûl dî “gjilè, bustin” (Tomasi, 1983). Cognon de provincie di Trevîs; presint a Pordenon. Tal 1711 Giacomo Crosato di Cargna abit. in Zirà – suo acquisto di beni dai Coo. di Partistagno (ASU Zucco 80).

Dal venit crose “crôs" e duncje al podarès vignî di un microtoponim. Croce al podeve jessi ancje il non di une persone. Al è presint a Tisane.

Si cjate a Dobardò (Jamian e il Valon).

Cognon tipic di Liariis e di Luvincis tal comun di Davâr. Al podarès jessi un diminutîf di crôs e duncje, in origjin, al à di jessi stât un microtoponim. Dut câs, Croce al jere però ancje un non di persone.

Dal non identic di une localitât de zone di Vicence: in cheste provincie a son trê frazions cun chest non (di Bolzano Vicentino, di Marostica, di Nove) (Rapelli, 1995). Cognon venit (massime de zone di Vicence); al è presint a Monfalcon.

Al ven di crosèra che, sedi in venit che par furlan, al vûl dî "beorcje, crosere". Duncje, in origjin, al à di vê volût dî di cualchidun che al jere a stâ dongje di une crosere di stradis. Si lu cjate a Concuardie.

Come Croatto, in origjin al podeve volê dî di cualchidun che al vignive de Cravuazie, ma di cualchi document si podarès pensâ che al vedi, cun plui probabilitât, une derivazion dal furlan ocidentâl croàt “corvat" (intal 1537 a Top di Travês Joanneti Corvati). La forme Crovato e somee tipiche di Solomberc di Secuals e si cjatilu ancje a Pordenon e a Spilimberc. Crovatto al è un cognon tramontin vignût fûr dai Miniutti di Col di Per e di Mointa dal lôr antenât Giacomo Miniutti ancje dit il Crovat presint tal 1610-1670 (Luchini, 1997); si cjatilu a Spilimberc, Top di Travês, Pordenon, Secuals.

Come Croatto, Crovatto, Croattini, e vie indenant, in origjin al indicave une persone che e vignive de Cravuazie. Il sufìs -ìn al è diminutîf. Tal 1590 Primos Krovatin di Dubla, in Vicinia di Vipacco (ACAU 719/1). Al è presint a Gurize (ancje come Hrovatin).

Forsit al ven di cròzzule “croçule". Cognon presint a Tramonç Disore dal 1641 (Luchini, 1997). A Daçan al è il toponim Case Crozzoli (IGM).

Cognon tipic dal paîs di Brize, tal comun di Savogne. Di culì si è spostât tai paîs dongje, tal fonts de val e dopo ancje te zone di Cividât e te planure furlane. Te forme uficiâl di vuê (Cromaz) la letare iniziâl C- e à sostituît la H- aspirade (Hrómac): duncje, si trate in efiets dal adietîf sostantivât sloven hrómac che al è derivât, cu la formante -ac (scrite -az), de peraule hróm “çuet”. Documentazion: 1586 dilectum nobis in Xsto filium Martinum Kromaz de plebe S.ti Petri Natissae (A. Cracina, Gli slavi della Val Natisone, Udin, 1978, pagj. 205); 1626 Leonardus filius Arnei Hromiz de Altauiza (Libri dai batisims di San Pieri); 1642 Stephanus Gromaz; 1664 filius Matthei Hromaz de Plataz; 1683 filius Valentini Hromaz de Briza; 1715 filius Johannis Hromaz de Briza (Libri dai batisims di San Lenart). Si à di notâ che l'adietîf hróm tal dialet sloven dal Nadison nol esist plui e al è ricuardât dome tal cognon Hrómac / Cromaz. Al è stât sostituît de peraule di divignince furlane čúotast. Il furlan çót / çuét al à dât i cognons Zotti, Del Zotto, Delli Zotti, e vie indenant, e ancje il cognon ibridât furlan-sloven Zottig o Zottigh (Čótič) presint tal Friûl orientâl. Di fat, chest chi si è fat cu la formante patronimiche -ič, dal adietîf furlan zót / çót e al jere presint a Oborze tal comun di Prepot za tal 1600 (1633 Bartolomio Zotig de Oborza; 1684 filius Melichari Zottig ex villa Oborza (Libri dai batisims di San Lenart) (Zuanella, Dom, 7, 1984; 8, 1999).