Dal todesc Fuchs “bolp". Presint a Gurize.

Al è a Monfalcon (al è presint massime te Italie meridionâl). Chescj cognons a vegnin di un toponim Fucile, de peraule dialetâl fucile "piere di fûc"; fûr di chestis zonis, cualchi forme e à di jessi derivade di migrazions internis a partî de Sicilie, altris a àn di jessi interpretadis come formis indipendentis di cheste tradizion e si puedin viodi come sorenons dal talian antîc focile “açalin", o di fucile “arcabûs" (CI 803).

Forsit di fol (viodi Fulizio), cul sufìs dispresatîf. Cognon di Staranzan.

Di Fulchîr, non antîc di persone di origjin gjermaniche. Par talian al podarès jessi Folchièro, ma in cheste lenghe al è ancje Fulco, Folco, Fulcèri, Fulgèri (viodi Folco in De Felice 1986). Tal Schedari Corgnali: 1283 dominus Fulcherus (o Folkerus) de Savorgnano; 1296 Folkerus de Tricesimo; 1318 d. Fulcherus de Mels; 1319 Fulcherius de Osopio; 1331 Fulcherinus de Montenars; 1347 Nicolao dictus Folchus de Artenea; 1365 Fulcurusius q. Orlandi de Casacho; 1390 Fulchìr a Privàn; 1553 Franciscus Fulcherius q. Jacobi a Buie. Cognon di Buie dulà che a son i toponims Cjafurchîr (Cja’ al è par cjase), Strade di Fulchîr e Mulin Fulchîr.

Al è probabil che al vegni di fol (viodi Fulizio) cun doi sufìs. Cognon di Roncjis di Monfalcon.

Di *fulìz, forme diminutive dal furlan / bisiac fol, salacor par intindi il soflet de pive che si sunave in Friûl almancul fin al secul XVIII. Di fat, si puedin considerâ ancje altris diminutîfs antîcs di fol doprâts par indicâ la pive: fulisièl e fulzìc (M. Puntin, informazion personâl). Cognon di Roncjis di Monfalcon documentât tal 1400 a Vermean.

Il cognon Fulla al è tipic dal paîs di Ponteà (comun di San Pieri dai Sclavons) almancul dal Sîscent e di li al è emigrât ancje te frazion cjâf lûc. Nol è un cognon facil di sclarî. Al podarès vignî di Ful, forme aferetiche di Cristoful, par talian “Cristoforo", cu la formante masculine slovene -a (Zuanella, informazion personâl).

Al è a Cjanive e a Polcenic. Salacor al ven di fol , o pûr di une forme aferetiche di Cristofol, par talian “Cristoforo".

Cognon lombart une vore frecuent te zone di Bergamo e ancje a Milan; al ven dal sorenon scherçôs e dispresatîf Fumagalli, fat de peraule lombarde fümà “fumigâ" e gal “gjal, poleç", o sedi “lari di poleçs": di fat, par robâ lis gjalins si deve fûc al gjalinâr cun fueis umidis e zolfar par che lis bestiis si instupidissin, par che no cuacassins fasint rumôr (De Felice, 1978). Lurati 2000 al concuarde dome in part cun chest sclariment: “... Intune maniere une vore plui semplice, chei che a àn inventât chest sorenon, cun spiriteç a àn doprât il verp zergâl fumare tal sens di "robâ, fâ sparî" (come cuant che une robe e "va in fum", e sparìs). Cun Fumagalli si voleve indicâ chei che, par cualchi lôr compaesan, a fasevin sparî gjalinis robantlis". Ancje par furlan fumâ al pues vê chest significât . Te nestre regjon al è a Udin (1777 Gio. Batta Fumagalli causidico) e a Tavagnà.

Al è probabil che al vegni dal non antîc di persone Fum o Flum, forme masculine di Fùmia (tal 1546 une Fumia a Tarcint), variante di Eufèmia (viodi ancje Flumiani): tal 1311 legavit ecclesie sancte Phumie de Segniaco (e je la glesie di Sante Eufemie a Segnà). No je di escludi une divignince direte di un masculin Eufèmi. Une altre ipotesi e je che al puedi vignî di Fumèo, variante di Tomèo, che al ven di Bartolomeo (De Felice, 1978). Tal Schedari Corgnali: Fumie = S. Eufemia; 1265 Donna Fumia (o Fumie) a Glemone; 1271 Odorlico dicto Fùmo a Glemone; 1393 Fumia dicta nigra de Cavalicho; 1397 dominam Fumiam relictam Venitti de Valvasono. La forme Fumi e je a Zui (Formeâs e Sece: 1540 Giacoma q. Giacomo Fumi di Sezza ved. q. Domenico de Romanis) e a Tumieç. Fumis, che al manten un stîl latin (ma nol è di escludi un sufìs -ìs, come in Brunisso, Menìs, e vie indenant), al à une cierte difusion te zone bisiache (Roncjis, Monfalcon, Foian e Redipulie, Starançan, Turiac, San Pieri dal Teritori), ma e je documentade la divignince de Cjargne. Maurizio Puntin mi sugjerìs che al puedi vignî dal furlan "fùmis" che al è un imprest di fier dai cjaliârs. Tal 1694 a Monfalcon: Fumis disse esser entrato Degano di Ronchi di sotto e giurò l’osservanza delle leggi... (Archivi municipâl di Monfalcon). Fumo si lu cjate a Rude.

Di Fulchîr, non antîc di persone di origjin gjermaniche. Par talian al podarès jessi Folchiero, ma in cheste lenghe si à ancje Folco, Fulco, Folchetto, Fulcèri, Fulgèro (viodi Fólco in De Felice 1986 e Fulchir culì parsore).

Di un sorenon cuntun significât evident. Al è a Staranzan. Tal 1567 don Andrea Furioso officiante in Ialmicco (Biasutti).

Diminutîf di Furlàn (viodi). Avonde difondût tal Venit (Vignesie e Trevîs). Te nestre regjon al è a Sacîl, Pordenon, Çopule, Udin, Prate, Flumisel, Daçan, Purcie.

Si clamin cussì i abitants de Patrie. Viodi ancje Furlàn. Cognon avonde difondût a Triest e ben presint a Verone e a Trent. Te nestre regjon al è a Gurize (documentât dal Cinccent), Udin, Roncjis di Monfalcon, Premariâs, Basilian, Bresse di Cjampfuarmit (culì al è rivât tal 1934 cun Giobatta Furlani nassût a Cividât tal 1861), Monfalcon, Listize. Par Cl 806 Furlani al è cuatri voltis mancul presint di Furlan e al è simpri ben difondût te Italie Nordorientâl e in Lombardie, a Fano, San Costanzo a in altris puescj de provincie di Pesaro e Urbin. La variante Forlani e je une vore presinte a Ferrara e Pesaro: a part câs a Rome, Napoli e Pescara, pal plui e je setentrionâl, massime emiliane e lombarde, ma no mancje a Turin, e a Gjenue. Forlano al è cuatri voltis mancul presint; al è te Italie meridionâl e, mancul, te Italie Nordocidentâl (CI 781).

Di furlàn cu la zonte dal sufìs sloven classic -ič (culì al è scrit -ich). Viodi Furlàn. Al è a Monfalcon.

Di furlàn, cuntune forme di stîl latin e notarîl. Viodi Furlàn. Al è avonde presint a Concuardie e Puart; al è ancje a Fossalte di Puart e a San Ganzian.

Etnic dai abitants dal Friûl, mudât in ete moderne, in maniere imprudente, cun “friulano". Viodi Furlàn, Furlani, e vie indenant. Tal Schedari Corgnali: 1321 Johanne Furlano a Aquilee; 1323 Henricho dicto Furlano a Glemone; 1323 Franciscus Furlanus a Vignesie; secul XIV Daniele dicto Furlano de Maniacho; 1468 Johannes Furlanus a Pordenon; 1560 Bulfonetto Furlano a Pontêbe. Al è a Feagne (1661 Zuanne Furlan), Udin, Colorêt di Montalban, Merêt di Tombe, Pasian di Prât. Un grup di Furlano al è in Calabrie, ator di Cosence, massime te zone di Vibo Valentia (CI 806). A Feagne, tal Sîscent un Borgo dei Furlani, che vuê al è clamât Borc des Lùches (Zucchiatti, 2000).

Diminutîf di furlàn, par talian “friulano". Viodi Furlàn, Furlani, e vie indenant. Al è tipic di Flumisel.

A vegnin clamâts cussì i abitants de Patrie. La pronunzie Fùrlan, cul acent su la prime silabe, plui che tipiche triestine nus somee, par dîle francje, ridicule. Al podeve jessi ancje un non di persone: tal NA o cjatìn Forlanus filius Febi de la Turre e Friulana de Turribus; tal 1342 Furlane filie olim ser Matie de Flagonia. Cognon une vore slargjât tal Venit (Vignesie, Trevîs, e v.i.) e a Triest. Te nestre regjon si lu cjate a Pordenon, Gurize (documentât almancul dal Cinccent), Monfalcon (atestât tal 1525), Foian e Redipulie, Roncjis di Monfalcon, Gardiscje, Aquilee, Udin, San Ganzian, Purcie, Cordenons, Staranzan, Daçan, Sacîl, Pasian di Pordenon, Çarvignan, Farle (Maian), Cividât, San Pieri dal Teritori, Fare, Turiac, Cimolais, Prate, Grau (1595 Nicolò Furlan), Flumisel, Vile di Flum, Manzan, Prepot, Sagrât, Montreâl, San Quarin, San Vît dal Tiliment, Dael, Mortean. Aromai nol è tant presint a Tramonç Disot li che, tal 1479, Domenico Furlan al lasse ae glesie di S. Marie une disposizion mortis causa di sîs ducâts par une messe di aniversari (Luchini, 1997). Al è un cognon tipic di Çale, tal comun di Prepot (1498 Colaus Furlani de Cialla; Colau filius Forlan de Cialla; 1500 Daniel Furlan de Cialla; 1550 Thomas filius qd. Furlan de Cialla, Senka uxor Antonii Forlan de Cialla) e o podìn pensâ che a une persone che e jere rivade li de planure furlane i sedi stât dât chest sorenon etnic, che po al è deventât cognon (Zuanella, Dom, 10, 2000); la plui part dai abitans di Çale e felevave sloven fin ai prins dal Nûfcent (cfr. O. Marinelli, Guida delle Prealpi Giulie, Udin, 1912, p. 617). La difusion plui grande si à, e al è clâr, fûr dal Friûl e tai siei confins, a Gurize, te Bisiacarie e tal pordenonês li che, tra l'altri, e pues jessi stade une "tornade" dal Venit. La presince dal cognon a Gurize e je sintomatiche: li no si sarès dal sigûr formât se in citât a vessin vivût pal plui furlans. Al è frecuent ancje te Republiche di Slovenie (al mancje dome te zone orientâl dal Paîs) e, massime te aree di Cjaudistrie, si cjate il patronimic Furlánič (Zuanella, Dom, 10, 2000). Pe Istrie si poìn a Bonifacio 2010, 590: “Par chel che al tocje Furlàn, documentât a Triest dal 1354, si lu cjate a Pula za tal 1238 cuntun Udurlico Furlano che al rapresente la atestazion taliane plui antighe dal non e cognon Furlàn, lât indenant a Pula e fin ca di nô". La difusion di chest cognon (e di altris simii) fûr dal Friûl al è un segnâl clâr de mobilitât de nestre int vie pai secui là che i cognons a jerin daûr a formâsi. Pes regjons no di confin cualchi atestazion nus è ufierte di CI 806: a Trent tal 1378 Bonaventura dit Furlanus e tal 1477 zuan furlan de carnia; a Copertino (Lecce) tal 1575 Lupo Antonio Furlano. Pe formazion dal cognon a puedin vê contribuît plui significâts che furlan/ furlano al à cjapât sù in regjons diviersis dal Friûl, par es. chê di “torzeon" e, soredut in Emilie, di “marcjadant ambulant", e ancje “persone particolâr, vivarose", in Venit “persone pluitost sparagnine", “contadin, montanâr" (CI). Che i furlans a sedin “particolârs e vivarôs" nus pâr une novitât, a mancul che no lessin ator pal mont dome i matarans. La nestre opinion, dut câs, e je che te formazion dal cognon e sedi une grande prevalence dal etnic, ancje parcè che i significâts dits sore a puedin jessi plui resints. No concuardìn cun cui che al crôt che furlan al sedi la forme dialetâl di “friulano" (CI 806); anzit, o sin sigûrs che la forme taliane plui juste a nivel storic e sarès furlano. La forme “friulano" no je in nissun dialet, ancjemò mancul tal toscan, e “friulano" al à cence dubis une origjin culte. Intai scrits dai leterâts si cjatavin lis formis friulese e forojuliense, ogni tant friolano (là che il Friûl al jere clamât Friòli); po dopo, dongje di chestis, e je vignude fûr friulano. E sune mâl e si fâs fature par pronunziâle, ma e à un aspiet di coretece formâl stant che il sufìs si apliche dret a "Friuli", come che di Italia si à Italiano. Ma nissun si è mai insumiât di inventâ un Lombardiano par Lombardo, o Carniano par Cargnello. Il DELI al è une vore clâr: “Friulano e je la forme culte resinte, là che la forme doprade par antîc e jere furlano (un Nicolaus Furlanus al è atestât tal 1290 o 1291)" e tant che prove al rimande ai cognons Furlanetto, Furlani, Furlano. Simpri il DELI al fâs lâ indaûr al 1760 la prime forme atestade di friulano. Ancje une danze popolâr rivade dal Friûl e impuartade a Vignesie tal Sietcent e cjape il non di furlana, non che al devente forlane cuant che e passe in France. Tal talian la danze compagne si clamave frullana pronunzie identiche di chê che i Toscans a vevin dât a un gjenar di falcet che, al è evident, a vevin cognossût midiant dai frullani come che a vevin di clamâsi i furlani in chê contrade. Lu prove il cognon Frullani, sparniçât pe Toscane, massime a Cutigliano (PT) e te zone di Grosseto (CI 802). Che chest cognon al derivi dal etnic, e no dal non dal falcet, (il CI al ten cont di dutis dôs lis teoriis), si pues dedusi dal fat che il non dal imprest al è documentât dome tal Votcent (DEI), un secul là che i cognons si jerin za formâts. Ma ancje i leterâts, e cun di plui florentins, a dopravin lis formis popolârs; cussì Jacopo d’Albizzotto Guidi, in Vinegia, corendo gli anni del Nostro Signore Gieso Cristo 1442, al scrîf che la citât e je plene di una gran quantità di facchini e Frullani che van facendo servizi e mestieri e, dopo une gjeopolitiche tirade al dîs di tutto il tenitor ch’è de’ Frullani, di qua da Piave e di là da Livenza, notant che sono e furlani di natura avari e d’intelletto grossi nella vista... A nô nus interesse che chest leterât toscan al vedi doprât sedi frullano (toscanisim) che furlano (al varà sintût cussì in Vinegia) e che nol dopri mai l'etnic friulano nancje cuant che al scrîf dal Friuli (Tutte castelle che son sott’Udine / e di Marano e anche d’Aquilea / benchè tra questi sia più gente rea/ che son fedeli ancor del patriarca...).

Variante di Fosco, non di persone. Al è presint a Pordenon e a Udin. Tal 1384 Ser Giovanni de Fusco vicegastaldo della Carnia; 1644 don Pietro Fusc curato di Tarvisio (Biasutti). Tal Schedari Corgnali: 1315 Joh. Fusco de Varmo; 1316 Fusca filia a Cividât; 1363 q. Fusche de Villa Foramini; 1378 Fusco q. Marchi de Prapot; 1500 Fusco a Çale (Prepot).

Diminutîf di Fuso, non di persone di origjin gjermaniche (Rapelli, 1995), o pûr di fuso “imprest par filâ". Tal dialet trevisan fuso al vûl ancje dî "cuesse di uciel". Cognon venit; al è presint a Tumieç. Tal 1636 fra Giuseppe Fusetto da Udine (Biasutti).

Di Fuso, non di persone di origjin gjermaniche (Rapelli, 1995). No escludìn fuso “imprest par filâ". Tal dialet trevisan fuso al vûl ancje dî "cuesse di uciel". Tal Schedari Corgnali: 1552 Colaus del Fuso q. Leonardi de Mozo; 1713 Floreano Fuso a Priôle; 1930 Fuso 5 fameis a Mueç. Al è presint a Udin.

Apelatîf dal mistîr di "fusâr", o sedi di cui che al fâs o che al vent fûs pe filadure o altris ogjiets di cjase" (Soranzo, 1996). Tal Schedari Corgnali: 1437 Jacomucius del Fusar a Siest; 1513 Gregorio q. Mathiae Fusarij de Zucconico sartorius Utini; 1931 Fusaro 4 fameis a Faedis. Al è presint a Prate e a Udin (salacor no furlan).

Cognon di Montreâl (6 fameis tal 1938). Battista Fignon tal boletin parochiâl di Montreâl, tal Març dal 1997 al scrîf: “Il cognon di vuê Fusaz al è il sorenon che e veve par vecjo la Famee dai De Benedet, che pôc par volte, dilunc dal 1700, al è deventât cognon". Al somee un peioratîf di fûs, ma no podìn escludi un microtoponim, stant che il NP al ripuarte ancje il significât di foran (pe zone di montagne dal Friûl di soreli a mont).

Come Fusàri (viodi). Cognon venit presint a Udin.

Come Fort (viodi), ma te version plui furlane (fuàrt = forte). Tal 1376 Donna Lena que dicitur Aseta q. fuart, -ti de Utino. Al è a Rude, Gurize e a Çarvignan.

Cognon tipic di Racolane e di Scluse. Al somearès di divignince todescje, ma no si sa altri. Al è ancje a Udin.

Dal adietîf fumul che al vûl dî "di colôr dal fum, grîs". Si dîs ancje di une persone che e à i cjavei blancs. Al podarès ancje jessi un diminutîf dal non antîc di person Fum (viodi Fumi). Chest cognon al è a Udin, Grau (1685 Battista Fumulo), Felet e Monfalcon. Par Grau, Scaramuzza 2001 al dîs: “La famee Fumolo e je documentade a Malisane sul imprin dal Sîscent. O pensìn che e sedi stade a servizi dai Strassolts, feudataris di chês campagnis, parcè che int di chê Famee e je dispès santule di batisim dai frutins dai Fumolo. Mistro Francesco Fumul (il cognon al mudarà cualchi an plui tart in Fumulo e, ai prins dal Votcent, in Fumolo), nassût a Malisane tal 1639, si è maridât a Grau tal 1665 cun Antonia Todaro e di cheste cubie al ven il ram dai Fumolo clamâts Brusaboschi. Invezit, di Battista nassût a Malisane tal 1644, maridât cuntune cierte Maddalena, al ven il ram dai Stroli ".

Cognon calabrês e sicilian. Caracausi 1993 lu met in relazion cul sicilian furfareddu “persone svelte, che e disbrighe fûr tant lavôr" e cun fòrfaru “solfarin". Al è a Osôf.