Chest cognon, cetant difondût a Davian (1578 Bastianus Mazoccus a Marsuris) e rapresentât a Pordenon, al somee vê une vieste plui venite che furlane (al è presint ancje a Padue e in provincie di Belum). Tal NA si cjate un Zaninus Mazochus de Venetiis e tal D.P. Venerium Mazzocchi habitantem in villa Turris tal 1429 e cun di plui Johanne Mazochi de Flumisino tal 1456. Tal Corgnali: 1295 Iohannis de Maçocco (o Maçoccus) a Manià; 1339 Manfredo dicto Maçoco de Varmo; 1344 Maçochum a Madrîs di Feagne; 1394 Nicolai Maçochi de Agaro a Dalnì; 1404 Ioh.e dicto Mazuchini q. Mazochi de Utino; 1450 Maçoch a Çupicje; 1456 Iohanne Mazochi de Flumisino; 1527 Michaelem Mazochi de Villotta a Purcie; 1808 Antonio Mazzocco a Vilote di Davian. Tal trevisan di cumò massòco al vûl dî “dûr, çondar, tart", plui o mancul come il furlan maçûl. In principi al sarà stât, duncje, un sorenon. No lassìn in bande che la vôs mazzòc e puedi esisti ancje par furlan o, almancul, in cualchi sô variante. Il NP al cite (tes “zontis"), però, dome mazzòcule “grues pinel di pitôr" e mazzòcje “grues cjâf di baston". Olivieri 1923 al fasarès derivâ chest cognon de peraule venite mazòco “persone gruesse e bocone". Viodi ancje Rapelli 1995.

Di mazzòcul che al varà volût dî “piçule mace" o di mazzòcje (NP) “grues cjâf di baston" e, duncje, par traslât, “persone cul cjâf grant" o, pluitost, “persone testarde, dure di comprendoni". Dutis dôs lis formis di cognon a son carateristichis di Culine (comun di For Davôtri), li che al comparìs tal 1605 cun Agata de Mazocolo, e al sorevîf ancje tal non di cjasade Maçócol a Culine Piçule. Tant che non di persone un Maçuchelus al ven fûr tal 1248 (DP).

Cognon di Davian di meti in colegament cun Mazzocco (viodi), che e je una clare forme diminutive otignude cul sufìs, tipic furlan, -ùt. Tal 1804 Mazzocut a Marsuris di Davian (Corgnali).

Di un diminutîf di mazza (viodi ancje Mazza) o dal non di persone Mazzo di divignince gjermaniche. Cognon massime sicilian e lombart cun presincis impuartantis ancje a Turin, Napoli, Gjenue, Verone e v.i. (CI 1100-01). Râr in Friûl cuntune scjarse presince a Udin. Tal Schedari Corgnali: 1285 Iohanni Maçole (o Maçolla) a Glemone; 1506 la Mazula n.f. a Codroip. Tal 1607 Ser Alfrato Mazzola della Scola di S.ta Barbara di Palma (ASU CRS 313).

Stant a Caracausi 1993, al è un cognon lombart (ma documentât ancje a CT, CZ, NA), dal toponim Mazzolèni in provincie di Bergamo. Si lu cjate a Udin e a Puart.

Di maçûl. Une volte chest tiermin al jere ancje sinonim di gramule, il maçûl che al coventave par sfibrâ il lin e la cjanaipe. Intun document di Midun dal 1461 cun malleis sive mazzolis si intindin i pestei dal mulin. In sens figurât cun maçûl si à chê di indicâ par solit une persone testarde o dure di comprendoni. No lassìn in bande une derivazion di Mazzo, non di persone di divignince gjermaniche in ûs par antîc (Lenart del Maç a Udin tal 1427). Tal 1429 a Udin io dey a Maçul (Vicario, 2001, b); tal 1442 a Cividât un Lenart figliastro de Maçul (Vicario, 2000), e tal 1598 Josefo de Mazul; tal 1450 a Pinçan Duri del Mazul (Scatton, 1994). Tal Corgnali: 1457 Mazolum (ancje Mazolius e Mazolus) a Resiute; 1468 Iohannes Mazoli de burgo Aquilegie Utini; 1471 Benedictus q. Dominici Mazuli de Sequalso; 1475 Io. q. Maçuli de Sequalso a Spilimberc; 1481 Ioannes Mazoluto a Cordenons; 1513 Iachomo Mazulut a Cividât; 1522 Colai Mazoli de Fonte frigido; 1526 Fr.co q. Nicolai Mazoli (o Mazolus) de Talponedo; 1529 Ioannem Leonardum del Mazul de Bratiulo. Si pronunziial Màzzoli o Mazzòli? Al moment no lu savìn e lis pronunziis di cumò a puedin meti fûr strade (Mènis al sarès Menìs, De Sìmon al sarès De Simón, Sànson al sarès Sansón, e v.i.). Se il cognon al rive di mazzûl la pronunzie e varès di jessi Mazzòli/Mazzòlo, se al rive dal non Mazzo al podarès jessi ancje Màzzoli/ Màzzolo. O vin di visâsi il cognon dal innomenât zuiadôr Mazzòla, e no Màzzola (cun ogni evidence al rive di “mazzuola”). La forme Mazzoli e je tipiche di Manià e dai contors (in zone un Andrea Mazoli de Sequalso tal 1513): culì si sint pronunziâ Màzzoli, ma lis formis antighis Pra Mazzui e Prat Mazzol citadis di Olivetto 1993 a fasaressin pendâ par Mazzòli (a saressin Maçûi e Maçôl); presint ancje a Monfalcon e a Udin. Mazzolo al è rapresentât a Basilian e a San Vît dal Tiliment. I Mazzolo di San Zuan di Cjasarse a derivaressin dai Mazzoli di Manià cul trasferiment di un ciert Mattia fu Lorenzo tal 1600. Une curiositât: Mazzoli al è cognon ancje a San Cataldo in provincie di Caltanissetta (Caracausi, 1993).

Di mazzulìn, diminutîf di maçûl (viodi Mazzoli); o pûr di Mazzo o Matzo, non di persone di divignince gjermaniche doprât te Ete di Mieç: il diminutîf Matzolo al è documentât, a Trevîs, tal an 773, tal “Codiç diplomatic longobardic". Une famee Mazulini e jere presinte a Vençon tal 1350 (Mistruzzi, 1930) e tal 1401 Maçolla (= “maçuele") di Tarcint al jere non di persone (Marchetti, 1934). Al è un cognon tipic di Fusee (comun di Tumieç); si cjate ancje a Vile di Cjargne, Soclêf, Udin, Gurize, San Zuan di Cjasarse (comparît culì tal 1780 vignût di Fusee).

Incressitîf di Mazza (viodi), o pûr dal non antîc gjermanic Mazzo, cence lassâ in bande incressitîfs di (Giaco)mazzo o altris nons di persone. Mazzón si cjate a Vignesie, a Padue e tal Trevisan; te nestre regjon al è pluitost frecuent a Brugnere, Fontanafrede, Sacîl, Pordenon, plui râr a Flumisel, Palaçûl, Udin. Mazzoni, frecuent tal Ferarês, si cjate a Gurize e a Udin.

Diminutîf di Mazzón, che chest al è un incressitîf di Mazza (viodi). Cognon difondût tal Padoan; presint a Daçan.

Forsit al va daûr dal furlan, o venit, masurin (o mazorin), non di une raze cognossude par talian come “germano reale"; o ben diminutîf dal venit mazòr “maiôr". Une famee Mezzavilla di Grediscje di Sedean e je ancjemò in dì di vuê sorenomenade Masurìn. Presint a Codroip.

Incressitîf di Mazza (viodi). Tal 1322 Iohanne dicto Maçotto (o Maçotus) de Aar in Gruagno (Corgnali). Presint a Pordenon (plui difondût tal Bressian).