SuperDizionari

ûs s.m.

Maniere di vivi o di puartâsi carateristiche di une ete, di un ambient, di une civiltât o di un grup sociâl

sinonimi

tradizion, usance, usaç, costum, mode

esempi

"poesiis umoristichis, legris e plenis di vite, a voltis satirichis, dispès cuntune vene di critiche moralistiche sui costums e i ûs di chei timps"

da "Pre Zaneto" di Roberto Jacovissi

"a mieze predicje l'è l'ûs / che il muini vadi ator cu la cassute"

da "Pronostic del 1821" di Pieri Çorut

ûs s.m.

Robe che si fâs di tant timp, dispès, in maniere regolâr

sinonimi

usance, usaç, costum

esempi

"al veve l'ûs, par chei nuviçs che a lu clamavin a sblanchisâ la cjase gnove, di regalâ il lavôr di sblanchisadure de cjamare nuviçâl"

da "Gjovanin Boser" di Bruno Colledani

"jo ten par ûs / di arâ la mê grant braide"

da "I, 184" di Ermes di Colorêt

ûs s.m.

Il doprâ alc, il mût di doprâ alc

sinonimi

usaç

esempi

"o vin cirût di dotâ la ortografie furlane des carateristichis che a i puedin dâ ae lenghe lis massimis pussibilitâts di ûs intune societât moderne"

da "La grafie furlane normalizade – Introduzion" di Xavier Lamuela

"i documents di ûs pratic de Ete di Mieç, de tarde Ete di Mieç, a son ancje pal Friûl lis fonts plui interessantis pal studi dal volgâr dai prins secui"

da "Documents de Ete di Mieç pal studi dal furlan antîc" di Federico Vicario

ûs s.m.

Cun valôr di prep., par introdusi une comparazion

sinonimi

come, tant che, usance, a ûs, a ûs di, compagn di, a usance, a usance di, use, a foze, a foze di

esempi

"lis vôs che o sintivi si smuartivin spontaniis, ûs intune glesie"

da "Viaç aes origjins dal Logos" di Adrian Cescje

ûs s.m.

[TS] (dir.) Dirit reâl di gjoldi di un ben di proprietât di cdn. altri, mobil o imobil, e di racuei ce che al rint, tai limits des necessitâts dal titulâr

esempi

"teren scuviert e sierât di muret e metût a prât a ûs dai incuilins"

da "La gnove caserme dai Carabinîrs par Cjampfuarmit, Basilian e Merêt di Tombe" di Aministrazion Publiche

ûs s.m.

[TS] (dir.) Norme no scrite che e ven de pratiche ripetude di compuartaments di une comunitât sociâl, che le calcole tant che un oblic juridic

esempi

"al è ta cheste suaze che a jentrin i tentatîfs dai rapresentants des comunitâts rurâls par condizionâ la lôr poie militâr a Vignesie daûr dal rispiet dai dirits e dai ûs tradizionâi"

da "Il Friûl de Joibe Grasse dal 1511" di Carli Pup

monolingue