SuperDizionari

arc s.m.

Arme di vuere, di cjace o sportive par trai frecis, formade di aste lungje e elastiche che aes dôs estremitâts i si fisse une cuarde in tension

esemplis

"Apol [...] al copà Piton cuntune frece dal so arc"

gjavât fûr di "Viaç aes origjins dal Logos" di Adrian Cescje

"i siei gnerfs a jerin come la cuarde tirade di un arc"

gjavât fûr di "Trê feminis" di Gianni Gregoricchio

arc s.m.

Struture architetoniche di forme plui o mancul semicircolâr, vueide tal mieç, che e permet di distribuî il pês di mûrs o struturis che a son parsore sui supuarts dal arc stes

sinonims

volte, volt

esemplis

"sot i arcs di Marcjât vieri, tal clâr e scûr dal soreli e de ombre, e spietà un moment prime di traviersâ"

gjavât fûr di "La tiere di Lansing" di Maria Forte

"dentri i arcs a ridevin pituris plenis di agnulins"

gjavât fûr di "I arcs" di Maria Forte

arc s.m.

Forme a sezion di cercli o robe che e à chê forme

sinonims

volt

esemplis

"e veve ceis sutilis, a forme di arc, come dissegnadis cul lapis"

gjavât fûr di "Ombris tal infinît" di Carlo Sgorlon

"cun dut il so dolôr ingjavât tes grispis de muse ruspiose… vadì ancje tal arc de schene, ta chel tremâ des mans"

gjavât fûr di "La aghe da pît la cleve" di Dino Virgili

"la spuinde e lave, tun arc lunc e viert, dal cuel de insenadure, viers miezegnot fin a une ponte che si slançave de bande di soreli a mont cuntune creste di crets scûrs"

gjavât fûr di "Int no consumade" di Agnul di Spere

arc s.m.

Schirie di elements che a formin une linie plui o mancul curve

esemplis

"cun dute la valade des Parts e dal Podê e l'arc grant des monts devant"

gjavât fûr di "Cuel Valâr" di Dino Virgili

arc s.m.

[TS] (mus.) Imprest fat di un bachet flessibil, che al ten in tension grene o altris fibris, che si passe su lis cuardis di un strument musicâl par fâlu sunâ, e par estension ancje strument a arc o musicist che al sune chel strument

sinonims

archet

esemplis

"«E là jù insom» al dîs il so amì mostrant la cise dai arcs dai violins [...] «viodistu Gurin che intant che lui al sune culì, la femine a cjase cuissà ce che cumbine!»"

gjavât fûr di "Al Macalè" di Alan Brusini

"si sintivin lis cialis come une musiche di arcs platâts tal vert"

gjavât fûr di "Sflameadis" di Pieri Menis

arc s.m.

[TS] (artes.) Imprest formât di un len che al ten in tension un fîl par taiâ la arzile e fâ modons

esemplis

"«Môf chel poleâr, gnogno! Sêstu indurmidît?» e jù une pache cul arc di fâ modon, par traviers de schene"

gjavât fûr di "La scuele dai fornasîrs" di Pieri Menis

arc s.m.

[TS] (gjeom.) Part di une curve cjapade tra doi ponts

arc s.m.

[TS] (anat.) Segment di circonference di un orghin

arc s.m.

[TS] (polit.) Complès di fuarcis politichis

esemplis

"de Democrazie Cristiane al Partît Comunist, passant par chei altris partîts dal arc costituzionâl, ducj a someavin sodisfats de gnove organizazion aministrative"

gjavât fûr di "Un Friûl difarent: i 90 mhz di Onde Furlane" di Max Mauro

arc s.m.

Dade di timp

sinonims

zîr

esemplis

"la trasformazion si le viôt tai dâts eletorâi suntun arc di timp plui lunc"

gjavât fûr di "Il risultât eletorâl dai partîts di identitât teritoriâl - A case study: Scottish National Party" di Sergio Cecotti

"intal arc di sîs zornadis"

gjavât fûr di "Il brevet" di Mario Turello

monolengâl