SuperDizionari

bale s.f.
(ba-le)

Sfere doprade par zuiâ

esempi

"cualchidun al veve pierdût une bale di tenis"

da "Leviathano!" di Checo Tam

"al cjape la bale tal mieç dal cjamp e si svicine ae aree furlane, al tire ben in diagonâl"

da "Udinese – Parma 3-2" di Marc Stolf

"al viodè Ricardo che al zuiave di bessôl tal curtîl, cuntune bale di gome"

da "Prime di sere" di Carlo Sgorlon

bale s.f.
(ba-le)

[CO] (sport) Massime intal zûc di fobal, tîr o passaç o ocasion di fâ une zuiade

sinonimi

balon

esempi

"devant a rivin pocjis balis che si puedin pardabon zuiâ e stramudâ in ocasions di rêt"

da "Udinese – Chievo 1-1" di Marc Stolf

bale s.f.
(ba-le)

Cualsisei robe di forme sferiche

sinonimi

sfere

esempi

"il soreli al tramontave, come une bale di fùc tal cîl, une maravee di viodi "

da "Storie di un cjan" di Egle Taverna

bale s.f.
(ba-le)

[CO] (stor.) Piçule sfere che si doprave intes votazions e vôt dât a pro o cuintri di cdn. o di alc

esempi

"ai vincj di Avost o soi stât balotât / conseîr comunâl / di Sant Zuan di Manzan; / e ai vût dutis lis balis in favôr"

da "Lis mês gloriis" di Pieri Çorut

bale s.f.
(ba-le)

Piçule sfere che si dopre in estrazions o lotariis

esempi

"il palc de tombule al jere prontât e ducj a spietavin il moment che il sindic al varès tiradis fûr, une a la volte, lis balis cui numars"

da "Îr e doman" di Gianni Gregoricchio

bale s.f.
(ba-le)

Toc di metal, o par antîc ancje di piere, trat di une arme di fûc

sinonimi

colp, proietil, proiet

esempi

"la bale i veve sfrisade la cope e il sanc i spissulave cjalt"

da ""Nocent"" di Maria Forte

"par fâ lis balis di fusîl tocjave recuisî i cjaldîrs di ram de puare int"

da "Il muc" di Roberto Ongaro

bale s.f.
(ba-le)

Robe false, dite par imboiâ

sinonimi

bausie, bombe, buride, buridon, carotule, falope, falsetât, fandonie, fanferie, fiandrine, flabe, flandogne, fote, implant, invenzion, sbarade, sflandocje, sflandogne, storie, bufule, sflocje, sflandocule, fanfaluche, frotule

esempi

"e par dimostrâ che no conti balis o visi che la notizie e je publicade cheste setemane su la Gazete uficiâl de Republiche"

da "Ocjo di no pintîsi" di Riedo Pup

bale s.f.
(ba-le)

Robe esagjerade (fig.)

sinonimi

berlete, bulade, buleç, cagade, canonade, fanfaronade, fole, lasagnade, sflocje, spacade, spaconade, spampanade, svant, trombonade, vant, vantarie, bufule, putanade

esempi

"nus sglonfaran il fiât de solite zonte di balis nazionalistichis"

da "Legnadis e pidadis" di Josef Marchet

bale s.f.
(ba-le)

Testicul (volg.)

sinonimi

balote, coion, testicul, totul, bergamasc, tendarel

esempi

"e jere vignude fûr une figure balorde. “A mi mi à dute la ande di un caz cun tant di balis sot” al veve comentât un dal trop"

da "Îr e doman" di Gianni Gregoricchio

bale s.f.
(ba-le)

Spec. tal pl., sensazion di fastidi o di stufe o robe o persone che a dan fastidi, che a stufin (coloc.)

sinonimi

barbe, rompiment di balis, coion, fastidi, secjadure, stufe

esempi

"ce balis lis provis di bande!"

da "Avengers" di Checo Tam

"no disin nuie di gnûf e dopo un pôc ti fasin vignî un pâr di balis"

da "Un Friûl difarent: i 90 mhz di Onde Furlane" di Max Mauro

bale s.f.
(ba-le)

Bevude fuarte di alcolics e i efiets che e lasse (pop.)

sinonimi

plombe, plene, pipine, susine, piruce, simie, strissule, parussule, çusse, civuite, sfisie, steche, cjoche, cuete, çussigne, implombade, sbrosigne, trusse, zufule

esempi

""A cjapâ balis, a doventâ cjochelis vês imparât pal mont!""

da "Eh! in chist mont, par doventâ siôrs, si dovi robâ" di Dolfo Zorzut

"va a durmî tal cjôt, cjochele. Viôt li ce bale che tu âs!"

da "Amîs come prime" di Alan Brusini

bale s.f.
(ba-le)

Robe che si à fisse tal cjâf, che si vûl a fuart

sinonimi

claut, carûl, fisse, chê

esempi

"ti passe chê bale - dissè jê - chi o soi e chi o resti, e tu va là che tu vûs… "

da "Mabile la Lunghine" di Maria Forte

bale s.f.
(ba-le)

Cuantitât di robe, spec. di paie, di stranc o di ciertis marcjanziis, fate sù

esempi

"al ti cjatave so pari, sentât su di une bale di stranc"

da "Come tai romançs" di Alan Brusini

monolingue