SuperDizionari

bulî v.intr.
(bu-lî)

Di licuits, tacâ a passâ tal stât aeriformi, formant te lôr masse bufulis di gas

esemplis

"meti le aghe a bulî cun pôc sâl, e cuant che e bol, butâ dentri i macarons un a la volte"

gjavât fûr di "Macarons di coce" di Margherita Timeus

Viôt ancje: boli

bulî v.tr.
(bu-lî)

Cusinâ te aghe bulinte

sinonims

lessâ

esemplis

"bulî lis patatis, passâlis e messedâ cun farine, ûfs e sâl, impastâ come par fâ i macarons"

gjavât fûr di "Jerbis salvadiis inte cusine furlane" di Giorgio Cadorini

"spelâ lis cjastinis (800 gr. ) e bulîlis par 40 minûts te aghe a pene salade"

gjavât fûr di "Cjastinis" di Margherita Timeus

bulî v.intr.
(bu-lî)

Cueisi in aghe bulinte

esemplis

"a bulivin i fasûi te pignate e sul fornel e cisave la bisate in tocj che e mandave un bonodôr di orâr"

gjavât fûr di "Vilie di Nadâl" di Pieri Somede dai Marcs

bulî v.intr.
(bu-lî)

Jessi une vore cjalt (ancje iperb.)

sinonims

scotâ, sbrovâ, brusâ

esemplis

"parcè che se il cjâf di un imprenditôr al è simpri cjalt, il so al bol"

gjavât fûr di "Contis sot spirt" di Raffaele Serafini

bulî v.intr.
(bu-lî)

Vê un procès di fermentazion

sinonims

fermentâ

esemplis

"e cuant che al gjave, dopo, che il vin al à bulît (al implenave dut il foledôr di un tuf che al cjoleve il flât), pre Jaroni al conte lis selis par un calcul"

gjavât fûr di "La aghe da pît la cleve" di Dino Virgili

"a taponarin i brentiei cuntun nailon e a lassarin che il most al bulìs"

gjavât fûr di "Prime di sere" di Carlo Sgorlon

bulî v.intr.
(bu-lî)

Jessi in progjet, movisi o sucedi intune situazion dinamiche, magari ancjemò no ben definide (fig.)

esemplis

"o sintivi dut chel businâ des feminis, che a tiravin jù tabârs al prossim: moroseçs de zoventût, pecjis dai viei, e ce che al bulive te cite di chê cjase o di chê altre"

gjavât fûr di "Sot il puarti" di Pieri Menis

"fâsi une idee di chel che al bulive inte societât furlane"

gjavât fûr di "Un Friûl difarent: i 90 mhz di Onde Furlane" di Max Mauro

bulî v.intr.
(bu-lî)

Movisi in maniere violente (fig.)

esemplis

"la tiara tremava duta sot dai pîts, cumi un venc co sofla il vint, la aga dal mâr buliva, cumi chê tal cjaldieron da la lissia"

gjavât fûr di "Il 'sinar dal re" di Ranieri Mario Cossâr

bulî v.tr.
(bu-lî)

[TS] (metal.) Saldâ a cjalt

esemplis

"al falà un pâr di voltis tal boli un fier e i de la colpe al garzon, disintji che no lu veve scjaldât ben"

gjavât fûr di "Cretevierte" di Roberto Ongaro

monolengâl