SuperDizionari

che coniun.

Al lee une principâl cuntune proposizion subordinade obietive, subietive, declarative, cul verp tal indicatîf o tal coniuntîf

Viôt ancje: cu

che coniun.

Dopo di pronons, adietîfs e averbis interogatîfs si cjate in dutis lis situazions là che no je la enclisi dal pronon subiet aton in code dal verp tal indicatîf, coniuntîf e condizionâl

esemplis

"a cui che i va dongje par fevelâi, lui al rispuint biel lavorant cence fermâ la scove di sanzit"

gjavât fûr di "Fadie come ale" di Maria Forte

"la paronance no si saveve cuant che e jere començade; si pierdeve tai timps"

gjavât fûr di "I furlans e i parons" di Riedo Pup

"il dificil al è capî ce che si plate sot dai simbui"

gjavât fûr di "Il miluç de magne" di Sandri Carrozzo

"si podarès prin di dut domandâsi cuâi che a saressin stâts i risultâts se e ves cjapât dentri un campion rapresentatîf di dute la popolazion fevelante, o ben, cuâl che al sedi il grât di “rapresentativitât” dal campion considerât a pet de interie popolazion de aree furlanofone"

gjavât fûr di "La cundizion sociolinguistiche dal furlan" di Linda Picco

"o savìn cui che tu sês e ancje parcè che tu sês ca"

gjavât fûr di "Int di masnade" di Alviero Negro

che coniun.

Al introdûs domanidis dubitativis

esemplis

"che e ves vude reson la agne Sunte a incolpâlu di puartâ disfurtune a se e a cui che i viveve dongje?"

gjavât fûr di "Il timp par ledrôs" di Mario De Apollonia

che coniun.

Al introdûs proposizions otativis, se no je la enclisi dal pronon subiet aton in code dal verp, o esortativis, in particolâr l'imperatîf di cortesie cul verp tal coniuntîf

esemplis

"sta atent a ce che tu fasis, vuarditi di cierts di lôr, fâs il galantom e che Diu ti judi"

gjavât fûr di "A è lade cussì..." di Pieri Somede dai Marcs

"Siôr plevan; al è di passaç, so fradi; che al vegni a saludâlu!"

gjavât fûr di "Fradi dal plevan" di Angelo Covazzi

"Puar Bandiere, almancul dopo muart che al puedi polsâ in pâs!"

gjavât fûr di "Bandiere" di Pieri Somede dai Marcs

che coniun.

In costruzions limitativis o ecetuativis, ancje negativis o ben in secuence cun "dome", "nome", "sôl"

esemplis

"il frutat al cresseve e nol veve altri tal cjâf che i uciei"

gjavât fûr di "L'oseladôr" di Catarine Percude

che coniun.

Di bessôl o in cumbinazion cun altris elements o in locuzions al introdûs proposizions compararativis esplicitis, cul verp tal condizionâl, tal coniuntîf o tal indicatîf

esemplis

"si à di difindi e di incressi plui che si pues la Autonomie Speciâl"

gjavât fûr di "La fin dal Stât Nazionâl jenfri ilegjitimitât, inutilitât e paradòs, tal spieli de ipotetiche Riforme Costituzionâl taliane dal 2016" di Sandri Carrozzo

"[Andrei Tarkovskij o Alexandr Sokurov] plui che fâ cines a fasin poesie visive"

gjavât fûr di "Sul troi de poesie visive" di Erika Adami

che coniun.

Al introdûs il secont element, e in câs chei dopo dal secont, in espressions corelativis

esemplis

"une buine soluzion e je chê de propueste diferenziante, sedi tai mûts che tai contignûts"

gjavât fûr di "La promozion de lenghe furlane sui mass media" di Erika Adami

monolengâl