Hai cercato la parola
monolingue
Torna indietro

monolingue

cjapiel s.m.
(cja-piel)
Toc di vistiari che si met tal cjâf, che al pues jessi di diviersis formis, dimension, colôr, materiâl e v.i., daûr de mode e de funzion
esempi
"ciapiel di femine, di om"
"cjapiel di stran, di paie"
"cjapiel a cane"
"cjapiel a cilindri"
"cjapiel di cogo"
"cjapiel di alpin"
"une siore elegantissime cun pelice, guants e cjapiel cu lis plumis"
da "Amîs come prime" di Alan Brusini
"ogni tant, cjapiel cu la plume nere sul cjâf, al leve a cualchi adunade, a mangjâ une gavete di pastesute cui amîs, a bevi un bocâl insiemi"
da "Par stradis lungjis" di Alan Brusini
"un trop di personagjos vistîts a neri, cun cjapiel a cilindri lusint"
da "Une letare par Bepo" di Pieri Menis
"lu cjalavin tai voi, i disevin dome: - Bundì, siôr cont - cu la man dongje la ale dal cjapiel, parcè che e je creance saludâ"
da "La aghe da pît la cleve" di Dino Virgili
cjapiel s.m.
(cja-piel)
Part di alc che e sta parsore
esempi
"il cjapiel dal lambic"
cjapiel s.m.
(cja-piel)
Formazion di nûi che e tapone la spice di une mont
esempi
"al spietave di començâ lis funzions cuant che e fumave la Vuese, ven a stâi cuant che la mont dal Jôf e veve un biel cjapiel di nûi sirocâi"
da "I furlans e il timp" di Riedo Pup
cjapiel s.m.
(cja-piel)
[CO] (micol.) Part superiôr dai foncs
esempi
"la variante Amanita Muscaria Aureola no à lis sborfadis blancjis sul cjapiel"
da "Il cjâf dai furlans" di Franc Fari
cjapiel s.m.
(cja-piel)
Organizazion, autoritât di nivel superiôr
esempi
"proviodi al superament de division des competencis in tancj uficis e coordenâ pluitost i diviers intervents sot di un sôl cjapiel"
da "Relazion dal Grup di lavôr “Planificazion linguistiche”" di Donato Toffoli
cjapiel s.m.
(cja-piel)
Introduzion, pal solit avonde svelte
esempi
"lassaitmi fâ un cjapiel sul argoment di cheste cunvigne e dopo o lassarai dut il timp ai relatôrs di usgnot"
cjapiel s.m.
(cja-piel)
[TS] (stor.) Tribût individuâl che al veve di paiâ ogni om jenfri vincjeun e sessante agns
cjapiel s.m.
(cja-piel)
[TS] (bot.) Tal pl., plante salvadie cun fueis in forme di cûr, che si pues mangjâ, lat. sient. Arctium lappa
sinonimi
lavaç dai cais, lavaç dai riçs, lavaç dai lacais
proverbi
"bisugne fâ il salût seont il cjapiel"
"cuant che la Mariane e à il cjapiel, met jù il falcet e cjol sù il ristiel"
"cuant che lis monts a àn il cjapiel, met jù la pale e cjol sù il ristiel"
"cuant che si metisi a fâ cjapiei, e nas la int cence cjâf"
"dulà che il pari al met il claut il fi al picje il cjapiel"
"fidance di altris, cjapiel di mat"
"se l'Ambrusêt al à cjapiel, ploie sigure"
"sperance dai altris, cjapiel di mat"
"tancj cjapiei e tancj cjistiei"
Torna in Cima