SuperDizionari

crût adi.

Che nol è cuet

esemplis

"une diete sane e previôt almancul 5 porzions di pomis e verduris ogni dì: une porzion e je la cuantitât di pomis o verduris crudis che a stan dentri di une man, o mieç plat di verduris cuetis"

gjavât fûr di "Mangje san 2" di Guglielmo Pitzalis

crût adi.

Dal persut, che al è fat cu la cuesse no cuete, dome salade e stagjonade

esemplis

"il Sant Denêl al rapresente il 15 par cent dai consums nazionâi di persut crût"

gjavât fûr di "Un persut unic par un lûc unic" di Oscar Puntel

crût adi.

Che nol è ancjemò madûr

sinonims

garp, crei, vert

esemplis

"lis vacjis lis vevin mangjadis i todescs, i cunins si ribaltavin te cuninarie cu la panze sglonfe, lis fueis dai lens a jerin penzis e magladis e lis pomis, di crudis a levin fraidis cence madressi"

gjavât fûr di "Come tai romançs" di Alan Brusini

"i miluçs da pît dal ort che al à a miezis cun so cusin: a jerin crûts, colôr de fiere, cul pêl lunc parsore; par madressi ur coventavin ancjemò doi mês"

gjavât fûr di "Lis predicjis dal muini" di Josef Marchet

crût adi.

Di materiâl, naturâl, no cuet o no lavorât

sinonims

rût, grês

esemplis

"la lôr vite si davuelzeve su chel fonts di fornâs todescje, cul modon crût e grîs imprin, po ros come impiât, cul lâ dai mês"

gjavât fûr di "Mabile la Lunghine" di Maria Forte

crût adi.

Dûr di sopuartâ, che al è dificil di acetâ e v.i. (fig.)

sinonims

brusc, dûr, ponzint, scabrôs, scontrôs, trist, violent, carogne

esemplis

"i nestris vecjos a garantissin che lôr a puedin clamâsi fortunâts, parcè che, prime di lôr - come che a contavin i lôr vons - a jerin stâts timps ancjemò plui crûts"

gjavât fûr di "I furlans e la fam" di Riedo Pup

"mi sintivi bandonade dal amì che plui o vevi confidât. Cheste e jere la crude veretât"

gjavât fûr di "Trê feminis" di Gianni Gregoricchio

crût adi.

Plen di violence, di tristerie inumane

esemplis

"vie pe seconde vuere la mont e je ancjemò teatri di fats une vore crûts jenfri partigjans e trupis di ocupazion todescjis e cosachis"

gjavât fûr di "La mont furlane" di Mauro Pascolini, Andrea Guaran

"i doi omis a si implantarin un cuntra l'âtri, crûts tant co loufs: a tacarin a menâ i braçs cuntuna fuarça rabina come se a vessin vût da gjavâsi la cjar"

gjavât fûr di "I voi di Miriscja" di Novella Cantarutti

crût adi., s.m.

Di clime o stagjon, frêt (fig.)

sinonims

dûr, frêt, garp, grêf, grivi, scabrôs

esemplis

"no si visavin nancje i viei de Plêf / di un frêt compagn, di une stagjon plui crude: / glaçade la aghe dei mulins e nêf, / ma nêf che tante no 'nd àn mai viodude"

gjavât fûr di "Pre Tite" di Enrico Fruch

"in chel an la nêf e menà un Invier plui crût di mai cui corvats sidrâts su lis cumieris e i lens che a criçavin di glace"

gjavât fûr di "La tiere di Lansing" di Maria Forte

crût s.m.

Il no jessi cuet, consistence, savôr, sensazion che al da ce che nol è cuet

esemplis

"il dì de Cinise, tune ostariute di campagne cu la cisile za sot la linde e la viole tal ricès da pît la cise, il grîs dal «memento» de matine si intone ae stiele di magri de renghe e al crût fresc dal lidric cul poc cjapât sù vie pe sere"

gjavât fûr di "La aghe da pît la cleve" di Dino Virgili

crût s.m.

Di pome, il no jessi madûr

sinonims

garp, crei

esemplis

"chei miluçs alì a son di un crût che ti lein i dincj"

crût s.m.

Timp, aiar frêt, temperadure basse che e fâs patî frêt

esemplis

"prin di jessi, viôt di cuvierziti ben, che al è un crût…"

gjavât fûr di "Il pigjama" di Pieri Menis

"a Codroip e jere usance vielonone di lâ a benedî pes cjasis dôs voltis ad an a Pasche Tafanie e a Pasche Maiôr, tal crût dal Invier e tal cricâ de Vierte"

gjavât fûr di "Pre Pitin" di Antoni Beline

crût s.m.

Bêç, monede

sinonims

franc, carantan

esemplis

"chel li, Silvio, nol à, e nol à mai vût un crût, lui; par chel al sta in bande"

gjavât fûr di "I colaçs" di Meni Ucel

"al rivà cence un crût te sachete, cun tante fam e une voie mate di sgnape"

gjavât fûr di "Cjase di Dalban" di Maria Forte

monolengâl