SuperDizionari

cumò av.
(cu-mò)

In chest moment

sinonims

dal moment, daurman

esemplis

"o 'nd ai fats mil di mistîrs, ma cumò o soi disocupât"

gjavât fûr di "Prime di sere" di Carlo Sgorlon

""Par me", al zontà, "dal moment che la crisi e je passade, tu podaressis lâ vie ancje cumò… Tant o sai che no pierdarai il gust di tornâ a vioditi…""

gjavât fûr di "Tal ospedâl" di Amedeo Giacomini

cumò av.
(cu-mò)

Intun moment passât che al è pôc

sinonims

maimodant, modant, cumò devant

esemplis

"o soi stât cumò là de viele: e je ben disponude"

gjavât fûr di "Un testament" di Pieri Somede dai Marcs

"Gjovanin colôr di rose, / l'è passât par chi cumò; / lui mi à dit: “Mandi morose!” / jo i ai dit: “Ma lafè no!”"

gjavât fûr di "Gjovanin colôr di rose" di Popolâr

cumò av.
(cu-mò)

Intun moment che al sarà ca di pôc

sinonims

cumò cumò, dal moment, daurman

esemplis

"o ilustrarìn cumò in curt i aspiets dissiplinârs che a son stâts svilupâts in classe"

gjavât fûr di "Une esperience di plurilinguisim inte didatiche de matematiche" di Carlo Cecchini, Matteo Fogale

"la competizion e reste, a ogni mût, un mecanisim fondamentâl pe selezion naturâl, ancje se, come che o cirarai di ilustrâ cumò, ancjetant potent si mostrarà chel fondât su la cooperazion"

gjavât fûr di "La evoluzion su la tiere. Une storie di competizion e cooperazion" di Angelo Vianello

cumò av.
(cu-mò)

Intal presint intindût tant che dade di timp ancje lungje, ancje tant che fase storiche

sinonims

al dì di vuê, aromai, in cumò, in dì di vuê, in presint, in vuê, in zornade di vuê, vuê, vuê dì

esemplis

"a Udin a 'nd jere un [di drâc] che al menaçave ducj chei che a passavin dongje de aghe dal lât che al jere une volte da pît dal cuel dal cjistiel, li che cumò al è Zardin Grant"

gjavât fûr di "Friûl di Magance" di Sandri Carrozzo

cumò av.
(cu-mò)

Par indicâ intal passât contemporaneitât o un moment sucessîf a alc che al jere stât prime

sinonims

alore

esemplis

"la tiere che ur jere stade imprometude in timp di vuere, cumò nissun ur e voleve plui dâ e cussì poiade la sclope e lâts in place a protestâ pe mancjance di lavôr si cjatavin denant i carabinîrs e i militârs che ur traevin intor"

gjavât fûr di "La seconde Irlande" di Carli Pup

cumò av.
(cu-mò)

Ancje cun valôr di coniunzion o par dâ plui enfasi, soredut a frasis esortativis, interogativis, esclamativis (enf.)

esemplis

"cumò scoltimi ben!"

"nancje lis aministrazions no son dutis compagnis: a 'nd è di miôr e di piês. E no stait domandâmi cumò cuale che e je la piês"

gjavât fûr di "I furlans e la patrie" di Riedo Pup

"ce âstu di bruntulâ cumò?"

gjavât fûr di "Al mancje un re" di Maurizio Mattiuzza

cumò av.
(cu-mò)

In corelazion cuntun altri "cumò", par pandi alternance

sinonims

ce, mo

esemplis

"savêso ce vite che al menave? Cumò sù pes montagnis dîs e dîs par burî fûr un cercifiu, mo cumò un viaç fin a Pordenon a proviodi une parussule; po l'Autun cun cualchi siôr a oselâ un rocul, e intant la prole che e vadi come che e vûl"

gjavât fûr di "L'oseladôr" di Catarine Percude

"no mancjava di cuant in cuant la blestema del vieli, cumò cuntra il vint, cumò cuntra la aga, cumò cuntra il fi che no veva colpa se gji trabalava la barcja, puartant a ogni sacodada fûr de lis mans del vieli il palet che fracjava nel pantan sota la aga"

gjavât fûr di "Il me paîs" di Federigo Comelli

monolengâl