SuperDizionari

cundizion s.f.
(cun-di-zi-on)

Ce che al covente par che al sucedi alc altri

sinonimi

câs

esempi

"e reste in pîts la cuistion de cognossince des cundizions che a àn favoride la vite e cualis che a son lis causis che a àn puartât ae formazion de prime celule"

da "Recension di La scienza non ha bisogno di Dio" di Lorenzo Marcolini

"o vin dit e mostrât tantis voltis che chestis cundizions [par vê la autonomie regjonâl] - etnichis, linguistichis, storichis, gjeopolitichis - a son plui netis e plui fuartis pal Friûl che no pe Sardegne o pe Sicilie, e pôc sù pôc jù compagnis di chês de Val di Aoste e dal Trentin"

da "Cuarde e savon" di Josef Marchet

Vedi anche: condizion

cundizion s.f.
(cun-di-zi-on)

Complès di elements, carateristichis, fenomens che a caraterizin cdn. o alc

sinonimi

circostance, stât, situazion

esempi

"rindisi cont des veris cundizions politichis di chês pocjis nazions che a mantegnin ancjemò un guvier acentrât"

da "La gnespule malmadure" di Josef Marchet

"Nardon al jere restât propit malapaiât e al si tormentave il cerviel avilît di chê sô cundizion [di brutece] e al cirive di vistîsi ben, di metisi un pôc in mostre, ma al jere dibant"

da "Nardon e Vigjute di Nani" di Pieri Somede dai Marcs

cundizion s.f.
(cun-di-zi-on)

Ancje tal pl., mût di jessi, mût di stâ

esempi

"Vera e je cumò in cundizions, cun dutis lis strussiis frontadis in chei agns de sô vite, che se e pense ae mame e aes baronadis petadis di picinine a rimpinâsi pai orts di chei dongje, no rive a gloti lis lagrimis che i travanin i voi"

da "Storie di Vera" di Ivano Urli

"Eluana Englaro e jere intun stât vegjetatîf, une cundizion che no esist in nature e che no esisteve prime des tecnichis di rianimazion avanzade"

da "Interviste a Amato De Monte" di Christian Romanin

"o pensavi ai filosofs che a disin che il patî al è te cundizion umane e che a curâmi al sarà nome il timp"

da "I forescj" di Alan Brusini, Gian Paolo Linda

cundizion s.f.
(cun-di-zi-on)

Posizion sociâl e economiche di une persone

sinonimi

nivel, grât, stât

esempi

"jo o soi stât pal mont un pieç di agns; e no cu la int di alte cundizion che e sa compuartâsi, ma simpri in mieç de puare int, cui operaris, cul popul bas"

da "Lis predicjis dal muini" di Josef Marchet

"il mangjâ e il bevi, come ancje il lâ a stâ tal miôr albierc, al è un simbul de cundizion alte e al à un fuart valôr di rapresentance"

da "Friûl e furlans te Histoire de ma vie di Giacomo Casanova" di Pierluigi Visintin

"di cundizion modeste, al studie prime a Vignesie, là che al cognòs Girolamo Muzio, il compagn di une vite, e po a Padue, cence però, che nus risulti, rivâ a laureâsi"

da "Il brevet" di Mario Turello

cundizion s.f.
(cun-di-zi-on)

Complès di capacitâts inteletivis che a permetin di capî, di valutâ e di fâ cun ecuilibri

sinonimi

cjâf, sintiment

esempi

"une femine plene di cundizion, brave di podine e spolert, che no pierdeve timp a meti perlis in fîl"

da "Il Bide di Miot" di Maria Forte

monolingue