SuperDizionari

dividi v.tr.
(di-vi-di)

Discomponi in tocs, in parts

sinonims

discomponi, disparselâ, frazionâ, sezionâ

esemplis

"dividi une linie in segments"

"dividi il pierçul in doi e gjavâ il vues"

"la cuistion dai «Trê cjapitui» e finì cul dividi il patriarcjât: in Aquilee (o a Cividât) un patriarcje schismatic favorît dai Langobarts; a Grau un patriarcje unît sot la protezion dai bizantins"

gjavât fûr di "Cuintristorie dal Friûl fin sot la Italie" di Josef Marchet

dividi v.tr.
(di-vi-di)

Fâ che alc che al jere ugnul al vedi plui parts

sinonims

scompartî, articolâ, frazionâ

esemplis

"al dividè il ministeri in cuatri dipartiments: fantarie e cavalarie, artiliarie e gjenîrs, intendence, aministrazion"

gjavât fûr di "Zuan Batiste Cavedalis - Une vite esemplâr" di Giovanni Pillinini

"la sale grande si pues dividi in doi locâi cuntune paradane"

dividi v.tr.
(di-vi-di)

Fâ di confin, di element di distinzion e v.i.

sinonims

separâ, isolâ, scompartî, spartâ, disisolâ

esemplis

"al è un sempliç porton di len che al divît la cjase dal plevan di dut il rest"

gjavât fûr di "Madalene" di Franco Marchetta

"la aghe dal Luri e faseve un grant arc che al cjapave dentri dut il ronc dai Batistons e lu divideve dal paîs"

gjavât fûr di "La aghe da pît la cleve" di Dino Virgili

dividi v.tr.
(di-vi-di)

Meti i elements di un grup in plui grups plui piçui

sinonims

dicerni, diferenziâ, disparselâ, dispartî, distingui, diszontâ, spartî

esemplis

"ogni scuadre e à 16 tocs che a vegnin dividûts in cheste maniere: 1 Re, 1 Regjine, 2 Rocs, 2 Alfîi, 2 Cjavai e 8 Pedons"

gjavât fûr di "Zuìn di scacs" di Nilde Teresa Negro

dividi v.tr.
(di-vi-di)

Fâ une selezion slontantant cierts elements

sinonims

disseparâ, separâ, tirâ vie, meti in bande, gjavâ, curâ, dicerni

esemplis

"dividi lis pomis maduris di chês indaûr"

dividi v.tr.
(di-vi-di)

Vê la percezion dai limits di robis diferentis tra di lôr

sinonims

separâ, disseparâ, distingui, dicerni, diferenziâ

esemplis

"ducj chescj pinsîrs le vevin ridote a vivi intun stât di confusion fra i doi monts, chel dai vîfs e chel dai muarts, chel de sperance e chel dal sconfuart, chel de realtât e chel dai siums. No rivave plui a dividiju fra di lôr"

gjavât fûr di "Il muc" di Roberto Ongaro

"cussì no si capìs plui nie. No si rive a dividi la semule dal forment"

gjavât fûr di "Evelin" di Gianfranco Pellegrini

dividi v.tr.
(di-vi-di)

Fâ in maniere che elements o personis che a jerin insiemi, dongje, cuintri e v.i. no sedin plui dongje

sinonims

separâ, slontanâ, parâ in bande

esemplis

"ogni volta che lis dôs barcjis pareva che dovessin tocjâsi, una gnova ondada lis divideva indaûr"

gjavât fûr di "Il me paîs" di Federigo Comelli

"un don di Diu che al scugnive pûr rivâ une zornade, par dividi chei fradis che si maçavin, par salvâ la zoventût"

gjavât fûr di "La Madone de Pâs" di Maria Forte

dividi v.tr.
(di-vi-di)

Fâ in parts di assegnâ o di cjapâ un pôc parom

sinonims

dâ fûr, dispartî, dispensâ, distribuî, spartî

esemplis

"cuant che il defont sindic Reglan al veva dividût i boscs dal cumun in lots, un par famea, il bosc di Viea a i era tocjât ai Specars"

gjavât fûr di "I cjans di not" di Novella Cantarutti

"i fîs di Meni de Coste, dopo tant timp, si jerin dâts dongje par dividi ce che al jere restât: tocs di tiere ca e là"

gjavât fûr di "Destins" di Pieri Menis

dividi v.tr.
(di-vi-di)

Vê, meti in comun un sintiment, une emozion e v.i. (fig.)

sinonims

spartî, condividi, vê part, dâ part, meti a part

esemplis

"Meni al divideve cun ducj lôr cheste gjonde"

gjavât fûr di "Trê feminis" di Gianni Gregoricchio

"il pês de mê situazion al jere masse fuart in chel moment, e jo o vevi bisugne di dividilu cun ognidun"

gjavât fûr di "Il dolfin" di Carlo Sgorlon

dividi v.tr.
(di-vi-di)

Produsi disconcuardie (fig.)

sinonims

slontanâ, separâ, distacâ, meti cuintri

esemplis

"une femine nus veve dividûts, ancje se di jê cumò no mi impuartave plui nuie"

gjavât fûr di "Il dolfin" di Carlo Sgorlon

dividi v.tr.
(di-vi-di)

[FO] (mat.) Calcolâ lis voltis che un numar al conten un altri

esemplis

"il diametri si calcole dividint la circonference par 3,14"

dividi v.tr.
(di-vi-di)

[CO] (mat.) Jessi contignût un numar just di voltis intun altri numar intîr

esemplis

"il trê nol divît il vot"

monolengâl