SuperDizionari

esterni adi.
(es-ter-ni)

Che al è fûr, che si viôt sul difûr, che al à a ce fâ cul difûr

sinonimi

difûr, fûr, infûr, par fûr, par difûr

esempi

"la part esterne de citât, intun ciert sens, e je il biliet di visite pal turist"

da "Passât gloriôs, avignî dubiôs" di Luca Zoratti

"il vescul Elie (571‑586 ), al à alçât dut l’edifici e al à ristruturât sedi la part interne sedi chê esterne"

da "Storie de art in Friûl" di Bepi Agostinis

"e' àn scugût puartâlu jù par une scjale esterne"

da "Scaiis" di Vico Bressan

esterni adi., s.m.
(es-ter-ni)

Che, cui che nol è membri di une organizazion, di une struture di vore e sim.

sinonimi

di difûr, difûr

esempi

"une di chês che a fasin lis puliziis tes fabricutis che a dan a esternis chel gjenar di lavôrs"

da "Delit in vie del Lavoro" di Igor Londero

"il probleme al è che cui che al rive di difûr (espert esterni) al à di inserîsi dentri di un cuadri orari za formât"

da "Furlan a scuele: la peraule ai insegnants" di Oscar Puntel

esterni s.m.
(es-ter-ni)

Part difûr

sinonimi

fûr, par fûr, difûr

esempi

"[la cjase] e à il zardin biel grant, e je intune zone trancuile, e plâs la forme dal esterni"

da "Ristruturâ o fâ sù gnûf? Ce costial di plui?" di Valentina Pagani

esterni s.m.
(es-ter-ni)

Ambient difûr, tant che ambient di interazion o tant che spazi viert fûr di une costruzion o di une struture

esempi

"intun stât di disabilitât grivie, il pazient ancje se cun grandis dificoltâts, al pues vê une interazion cul esterni"

da "Interviste a Amato De Monte" di Christian Romanin

esterni s.m.
(es-ter-ni)

[TS] (sport) Tal sport dal balon, cui che al zuie suntune fasse laterâl dal cjamp

sinonimi

ale

esempi

"l’Udin al fâs zirâ bale cun Walace che, denant de difese, al coordene lis operazions, slargjant il zûc in direzion dai esternis Srtyger Larsen e Molina"

da "Crotone – Udinese 1-2" di Marc Stolf

monolingue