SuperDizionari

fâ sù loc.v.

Inrodolâ o involuçâ intor di se stes o cun alc

esemplis

"al veve il compit di sbobinâ lis peliculis dai films e di fâlis sù tes bobinis plui piçulis dal proietôr"

gjavât fûr di "I 40 agns di VideoTeleCarnia" di Marta Vezzi

"la panzete e à il stes tratament dal socol. Dome che, dopo lavade cul vin, o dopri une cuince che e nasedi un tic di canele. Dopo e ven rodolade e insacade: o le fâs sù te sô crodie al puest dal budiel, cussì no cjape di ranzit"

gjavât fûr di "La salsamentarie de Basse" di Diego Navarria

fâ sù loc.v.

Fâ une costruzion, un edifici, une struture, in câs ancje imateriâl (ancje fig.)

esemplis

"di là de ferade a vevin fat sù tantis cjasis gnovis, ben pituradis, cui cops ros, il zardinut devant cun tantis rosis"

gjavât fûr di "Di là de rêt" di Jolanda Mazzon

"muredôrs, ma ancje tecnics e impresariis a tacâ dai agns ‘90 dal ‘800 si ju cjate intes tieris de Russie a fâ sù puints e meti jù sinis"

gjavât fûr di "Felix Marchi e il sium dal furlan-furlan" di Max Mauro

"dit e fat si met a fâ sù une casse di muart, cu lis breis che al à cjatât par cjase"

gjavât fûr di "Funerâl a Pâl Piçul" di Pieri Menis

"metint dongje alc di ce che mi contavin in Cjargne sot la nape e un fregul di ce che ai sintût a contâ venci jù pal Friûl, e tacant dut insieme pulît cu la salive, soi rivât a fâ sù une flabe di buine misure"

gjavât fûr di "Il tor di Mueç" di Luigi Gortani

fâ sù loc.v.

Fâ in mût che plui materiâl o plui elements, materiâi o imateriâi, a sedin dongje e a disposizion (ancje fig.)

esemplis

"cuant che al jevave il soreli, si lave a fâ sù fen"

gjavât fûr di "La cjase" di Alviero Negro

"par fâ sù i bêçs, e jere lade bigate a Gradiscjute"

gjavât fûr di "Îr e doman" di Gianni Gregoricchio

monolengâl