SuperDizionari

torne indaûr

monolengâl

glorie s.f.
(glo-ri-e)

Onôr straordenari otignût par capacitâts e merits ecezionâi

sinonims

celebritât, nomee

esemplis

"[la puare int] e pense a la vite, a la famee, al lavôr. I grancj, invezit, a pensin a la storie e a la glorie"

gjavât fûr di "Vitoriis e batostis" di Riedo Pup

"mi vevin puartât vie fin une spade, / che o tignivi in memorie / di un mio antenât, vuerîr di imense glorie"

gjavât fûr di "Une gnove citât in Friûl" di Pieri Çorut

glorie s.f.
(glo-ri-e)

Ce o cui che al è reson di svant, di braùre

esemplis

"lis oparis di art che conservìn cun tante cure jenfri chescj mûrs e che son la glorie e la ricjece dal convent"

gjavât fûr di "La Madalene" di Zuan Lurinçon

"nol à stât tant a dâsi a cognossi par un dissegnatôr maestri e di bon gust, onde chei di Cividât lu calcolavin za par une glorie gnove del paîs"

gjavât fûr di "Trê Rafaei in jerbe" di Giovanni Gortani

glorie s.m.
(glo-ri-e)

[TS] (lit.) Preiere cristiane che e rint graciis a Diu tes personis dal Pari, dal Fi e dal Spiritussant

Viôt ancje: gloria

glorie s.f.
(glo-ri-e)

Cundizion di beatitudin, di gracie concedude di Diu, ancje in espression di rispiet fevelant di cui che al è za muart

esemplis

"pre Scjiefin [...] al dîs la sô messute cun cuatri peraulis su la glorie dal paradîs"

gjavât fûr di "Lis predicjis dal muini" di Josef Marchet

"mê mari, puare femine, che Diu le vedi in glorie, che e je stade une vore comandadorie e zelose di me"

gjavât fûr di "Cretevierte" di Roberto Ongaro

glorie s.f.
(glo-ri-e)

Ancje tal pl., cundizion di contentece beade

esemplis

"al veve mandât a cjase une casse di bêçs cuntune letare a sô mari, dulà che i diseve, che la vuere i veve fat bon pro e che al ere deventât un grant siôr. Jê, dute in glorie, e butà vie la vore e si metè a spietâlu"

gjavât fûr di "Il cjan blanc di Alturis" di Catarine Percude

"ur presentà une pladine di jote che e fumave la anime, cun cierts fasûi dentri, tenarins tenarins, che Sant Pieri al lave in glorie a mangjâju"

gjavât fûr di "La ospitalitât" di Luigi Gortani

"il plevan al è tes sôs gloriis e al benedìs cheste biele ocasion"

gjavât fûr di "Co l'amôr al cimie" di Costantino Smaniotto

glorie s.f.
(glo-ri-e)

Situazion o manifestazion sflandorose di alc o di cdn.

esemplis

"une Viarte in rose, come un meracul te glorie dal soreli"

gjavât fûr di "La aghe da pît la cleve" di Dino Virgili

detulis

"cuant che no si rive a dî: "glorie di Diu!" al è finît dut"

"ducj i salms a van a finîle in glorie"

"nissun nol vîf di glorie"

torne sù