SuperDizionari

grup s.m.

Insiemi di personis che al forme une unitât par fâ une ativitât, une funzion, par condividi alc e v.i.

sinonims

clape, cjap, compagnie, complès, cubie, trop, scjap

esemplis

"il teatri popolâr al veve bisugne di jessi promovût e di vê un coordenament tra i piçui grups"

gjavât fûr di "Un Friûl difarent: i 90 mhz di Onde Furlane" di Max Mauro

"i conseîrs comunâi a àn la facoltât di costituîsi in grups, daûr des modalitâts fissadis dal regolament"

gjavât fûr di "Statût dal Comun di Udin" di Aministrazion Publiche

"il guvier al à nomenât un grup di esperts par monitorâ lis cundizions sanitariis dai residents"

gjavât fûr di "Il disastri de centrâl nucleâr di Fukushima Dai-ichi" di Alessandro Pascolini

"il nestri grup eclesiastic e culturâl al à simpri smicjât a peâ storie e religjon, fede e culture"

gjavât fûr di "Sant Jacum, là che al finìs il mont" di Antoni Beline

Viôt ancje: grop

grup s.m.

Complès musicâl

sinonims

complès

esemplis

"a son in gjachete e golarine, un look che al ricuarde i grups dai agns '80 come Heavan 17 e Propaganda"

gjavât fûr di "La maree nere" di Checo Tam

grup s.m.

Insiemi di robis, elements, concets e v.i. che a àn cualchi caratar in comun

esemplis

"i tescj a son dispartîts in doi grups: i tescj di informazion e chei di imagjinazion"

gjavât fûr di "Corpus linguistics" di Vladimir Petkevic

grup s.m.

[TS] (art) Opare artistiche che e figure plui personis insiemi

esemplis

"de statuarie minôr si segnale il grup di Zeus che al rapìs Ganimêt"

gjavât fûr di "Viaç aes origjins dal Logos" di Adrian Cescje

grup s.m.

[TS] (biol.) Te tassonomie, insiemi di categoriis coordenadis o coreladis tra di lôr, no simpri cun valôr tassonomic specific

grup s.m.

[TS] (chim.) Tal sisteme periodic di Mendeleev, complès di elements cun proprietâts chimichis cu la stesse valence e che si somein

esemplis

"il ram al fâs part dal grup dai metai di transizion"

grup s.m.

[TS] (chim.) Complès atomic in stât di marcjâ il compuartament chimic dal compuest li che al è dentri

grup s.m.

[TS] (chim.) Formazion atomiche dentri di une molecule organiche, trasferibile ancje tant che radicâl libar

esemplis

"grup metilic"

grup s.m.

[TS] (mineral.) Complès di speciis di minerâi cun carateristichis similârs

grup s.m.

[TS] (mat.) Struture algjebriche definide suntun insiemi di elements cun operazion binarie associative, li che a esistin l'element neutri e, par ogni element, il so inviers

grup s.m.

[TS] (biol.) Grup dal sanc

esemplis

"il grup 0 al è donadôr universâl"

grup s.m.

[TS] (gjeol.) Unitât stratigrafiche superiôr

grup s.m.

[TS] (ling.) Complès di lenghis sûrs dentri di une famee plui grande

sinonims

branc, ram, rame

esemplis

"il grup romanic"

grup s.m.

[TS] (ling.) Unitât struturâl a mieç fra la peraule e la frase

sinonims

sintagme

esemplis

"grup verbâl"

monolengâl