SuperDizionari

impiâ v.tr.
(im-pi-â)

Fâ che alc al cjapi fûc

sinonims

piâ, inviulâ

esemplis

"Rose e suspire e si prepare a impiâ il fûc par fâ di cene"

gjavât fûr di "Vilie di Nadâl" di Pieri Somede dai Marcs

"al veve za impiât il fogolâr, ma no pal frêt, che no sarès stade ancjemò ore, ma par vê compagnie"

gjavât fûr di "Cretevierte" di Roberto Ongaro

"al impià un spagnolet e al soflà in alt il fum"

gjavât fûr di "La aghe da pît la cleve" di Dino Virgili

impiâ v.tr.
(im-pi-â)

Fâ che alc, massime un mecanisim cuntun motôr o che al prodûs lûs, si meti in vore

sinonims

ativâ, inviâ, meti in vore, piâ, tacâ

esemplis

"intun salt al jere za te machine, le veve impiade e al jere partît di buride"

gjavât fûr di "L'om misteriôs" di Antescûr

"tal vagon e jere pocje lûs e lui nol veve volût impiâ il lusôr eletric par no dismovi un vieli che al durmive"

gjavât fûr di "Chê dì che al neveà a Vignesie" di Agnul di Spere

impiâ v.tr.
(im-pi-â)

Meti in agjitazion, in bulidure (fig.)

sinonims

animâ, ardi, brusâ, conturbâ, discjadenâ, esaltâ, imboreâ, incendiâ, inflamâ, intiziâ, movi, saborâ, sboreâ, scalmanâ, scjaldâ, scombuiâ, tiziâ

esemplis

"messaçs che ducj i sienziâts di sintiment e il Pape a continuin a mandâ par tentâ di dismovi e di impiâ la pacjifiche ribelion de umanitât cuintri lis armis"

gjavât fûr di "I furlans e il disarmo" di Riedo Pup

"in paîs al veve sintût un mieç discors su di lui che al veve impiât ancjemò di plui la sô curiositât"

gjavât fûr di "Prime di sere" di Carlo Sgorlon

impiâ v.tr.
(im-pi-â)

Jemplâ di lûs (fig.)

sinonims

iluminâ, slusorâ

esemplis

"jê, involuçade di un rai di soreli che a i impiave i cjavei indorâts, e jentrâ, lu saludà"

gjavât fûr di "Eivissa mon amour" di Fabian Ros

"intant al cjalave il cîl; chel cîl che al impiave simpri i siei voi"

gjavât fûr di "Il vivi al è chel rangjâsi" di Maria Forte

impiâ v.tr.
(im-pi-â)

Fâ deventâ ros come il fûc (fig.)

sinonims

inflamâ, piâ

esemplis

"«No sai scrivi» e rispuindè e un ros lizêr i impià la muse"

gjavât fûr di "La tiere di Lansing" di Maria Forte

impiâ v.tr.
(im-pi-â)

Vierzi un contrat, spec. di sigurazion o di prestit (fig.)

esemplis

"chel cjaviestri di nevôt, lant vie pes Americhis, dopo vê impiade la ultime ipoteche su la robe, i veve lassade li [la viele contesse], sul cjadreon tant che un vieri catan"

gjavât fûr di "Il colôr dal marcjât" di Alan Brusini

monolengâl