SuperDizionari

invadi v.tr.
(in-va-di)

Jentrâ cu la fuarce intun teritori par ocupâlu, o ancje par fiscâlu e sim.

esemplis

"un cosac de armade dal maressial Suvarov che il zar de Russie, Pauli prin, al veve mandât in jutori a la Austrie par dâi une man a fâ cuintri ai francês che a invadevin la Italie"

gjavât fûr di "Cretevierte" di Roberto Ongaro

"774: Carli re dai Francs, clamât dal pape, al cjape il ream langobart. No vegnin invadûts nome i ducâts di Spoleto, Benevento e chel furlan"

gjavât fûr di "Rotgaut e la politiche furlane langobarde" di Sandri Carrozzo

invadi v.tr.
(in-va-di)

Di animâi, plantis o altris organisims, difondisi in maniere esagjerade intun ambient, soredut intun ambient gnûf

sinonims

jemplâ, infestâ

esemplis

"in chescj ultins agns il bacin al à patît un procès di imbuniment par vie che si son slargjadis simpri di plui lis plantis di canele, che a àn invadût dut il lât"

gjavât fûr di "Il Lât di Minisin" di Aministrazion Publiche

invadi v.tr.
(in-va-di)

Jentrâ intun lûc intune forme no regolâr, no abituâl, no permetude

sinonims

ocupâ

esemplis

"[i puars] a deciderin di invadi tant i terens pustots e a prât che chei fitâts e coltivâts, e di mandâ un ricors a Udin cuintri dai deputâts dal Comun di Sant Denêl"

gjavât fûr di "Int di masnade" di Alviero Negro

"un om al veve invadude chê altre corsie e ta chê altre machine, une femine, cui siei doi fruts, no veve rivât adore a evitâ l'impat"

gjavât fûr di "Altris contis di famee" di Raffaele Serafini

invadi v.tr.
(in-va-di)

Lâ intun lûc in tancj (fig.)

sinonims

jemplâ

esemplis

"di Istât i turiscj a invadin Lignan"

invadi v.tr.
(in-va-di)

Ancje di alc di inanimât, jemplâ un puest

sinonims

cjapâ

esemplis

"la aghe alte e veve invadude la citât"

gjavât fûr di "Ombris tal infinît" di Carlo Sgorlon

"las fumatas a vongolarin e, pesantas tant che las agas di una brentana, a invaderin i cjamps"

gjavât fûr di "La albe di Primevere" di Ermidio Picco

invadi v.tr.
(in-va-di)

Jentrâ in cuistions che a son di competence di altris (fig.)

sinonims

cjapâ, pescjâ

esemplis

"la Cort Costituzionâl e veve scancelât lis parts di cheste leç che a invadevin la autonomie scolastiche"

gjavât fûr di "Il furlan al è rivât tes nestris scuelis. Si met in vore il Regolament pal insegnament de marilenghe in regjon" di Patrizia Pavatti

monolengâl