Tu âs cirût la peraule
monolengâl
torne indaûr

monolengâl

lâ vie loc.v.
Slontanâsi di un puest o di une compagnie
esemplis
"tor miezegnot i amîs a van vie e ancje el paron di cjase al va sù a durmî"
gjavât fûr di "Cui che al coione, al reste coion" di Dolfo Zorzut
"«Disii che no stedi lâ vie, e che cuant che al sarà il moment di fevelâ i fevelarai jo»"
gjavât fûr di "A ogni cost" di Vittorio Vittorello
lâ vie loc.v.
In particolâr tignint sù costruzions cu la preposizion "par", movisi in maniere gjeneriche o a traviers di alc
esemplis
"Catinuta a lava via pai cjamps e pai rivâi e pai prâts ducj plens di rosis e rusutis di tancj colôrs"
gjavât fûr di "Catinuta" di Ugo Pellis
"la fontane e jere suntune culine lontane, di là di un palût, e si scugnive lâ vie par un puint di bree"
gjavât fûr di "Il gno prin pâr di scarpis" di Pieri Menis
lâ vie loc.v.
Lâ ator cuntune cierte ande, cuntun ciert aspiet, fasint viodi ciertis carateristichis
esemplis
"un militâr cussì biel vistût e dut lustrât i pareve une persone in grant, e si tignive in bon, e cuant che e saveve di vêsal daûr e leve vie impicotide gjoldintse tra piel e vues"
gjavât fûr di "L'ucielut de Mont Cjanine" di Catarine Percude
"e viodeve ancje pes stradis, massime pal Corso, lis mulis vistidis propi come chês te television. Lis cjalave lâ vie siguris, sence pôre di nuie e di nissun, no come lôr di piçulis, jê massime"
gjavât fûr di "Di là de rêt" di Jolanda Mazzon
lâ vie loc.v.
Dal timp, passâ
sinonims
lâ dilunc, passâ
esemplis
"il marcjât al tire, i ordins ju veis in man… No larà vie trop che la fabriche e tornarà a piâ doman ce che e piart vuê"
gjavât fûr di "Barbe Masaniello" di Gianni Gregoricchio
"al larà vie un an prin di organizâle ben"
gjavât fûr di "Memoriis di politiche linguistiche" di Adrian Cescje
lâ vie loc.v.
Di alc che si viôt, che si sint, che al à cualchi efiet, sparî
esemplis
"la canute nere [...], lade vie la cragne, cumò e je plui splendide ancjimò de famose canute nosele che al puartave tal nonantevot siôr Momolo Bressan segretari di Surisins"
gjavât fûr di "Viaç a Vignesie" di Arturo Feruglio
"al è un biel clime ca sù. Mi son parfin lâts vie i dolôrs reumatics, o miôr… ju varai ancjemò, ma no ju sint"
gjavât fûr di "La maree nere" di Checo Tam
lâ vie loc.v.
Di cuantitât di bêçs, materiâl, timp e v.i., coventâ e jessi impegnade par vê un ciert risultât
esemplis
"mi va vie mieze paie dome par paiâ il fit de cjase"
"pensait che par puartâ indenant une vît di un incalm ti van vie trê agns par vê i prins risultâts"
gjavât fûr di "Il paleontolic dal vin furlan" di Redazion il Diari
lâ vie loc.v.
Ancje cun valôr esortatîf gjeneric, cence sens di moviment
sinonims
lâ
esemplis
""Parcè cjalistu dut a ledrôs? Anìn vie, spude il marum e contimi i grîs che ti passin pal cjâf""
gjavât fûr di "Lis âfs" di Catarine Percude
lâ vie loc.v.
In costruzions cul gjerundi, par segnâ une azion progressive o continuade
sinonims
lâ
esemplis
"e si sintive pôc lontan di alì / a cjantâ il rusignûl / ci un tenôr di fâ dûl; / piulavin tel nît i uceluts, / planchin planchin vignive jù il roiuç, / al leve vie cidinantsi il creât"
gjavât fûr di "Zoventût e Primevere" di Pieri Çorut
detulis
"a la ostarie si fâs il cont prin di lâ vie"
"ce che al ven cence fadie, in pôc timp ancje al va vie"
"i bêçs dai predis a vegnin cjantant e a van vie sivilant"
"il mâl al ven a cjars e al va vie a oncis"
"il mâl al ven a funts e al va vie a oncis"
"in trê dîs la nêf e va vie: Sant Zuan, Sant Pieri e Sant Jacum"
"si à simpri di lâ vie cun doi solt di mincjon te sachete"
torne sù