SuperDizionari

libar adi., s.m.
(li-bar)

Che, cui che nol è in sclavitût ni in presonie

esempi

"Cheste e je la constatazion che e vierç il tratât sul Contrat sociâl, "L'om al è nassût libar e pardut al è metût in cjadenis""

da "La invenzion dal stât" di Fabian Ros

Vedi anche: liber

libar adi.
(li-bar)

Di un teritori o di une comunitât, che no àn di stâ sot di un regjim autoritari o di une potence foreste

sinonimi

autonom, indipendent

esempi

"un Friûl che al vûl jessi libar intun mont di int libare e in pâs"

da "Un Friûl difarent: i 90 mhz di Onde Furlane" di Max Mauro

"Vive il Friûl Libar!"

da "Orâl - Radio Onde Furlane" di Toni di Vât

"Gora Euskal Herria askatuta! Vive il Paîs Basc libar!"

da "Paîs Basc: la declarazion integrâl di ETA su la sô dissoluzion" di Carli Pup

libar adi.
(li-bar)

Che al po decidi e fâ cence condizionaments o imposizions

esempi

"la Austrie e jere la Europe: la Europe civîl, là che ognun al jere libar di fevelâ la sô lenghe, di professâ la sô religjon, di vivi la sô culture"

da "Franz Josef e Garibaldi" di Riedo Pup

"vô o sês libare di disponi de vuestre robe cemût che o volês"

da "Un testament" di Pieri Somede dai Marcs

libar adi.
(li-bar)

Emancipât, cence oblics, cence leams familiârs o afetîfs, cence difiets

sinonimi

emancipât, viert

esempi

"[tes impresis nassudis dopo de seconde vuere mondiâl] a lavorin principalmentri lis feminis, finalmentri libaris de influence di vons, madonis, agnis e nevôts"

da "Cuintristorie dal Nûfcent 1950-1960" di Angelo Floramo

libar adi.
(li-bar)

Che nol à oblics o impegns particolârs

esempi

"lunis no sai se o soi libare. Si sintìn domenie di sere"

da "I forescj" di Alan Brusini, Gian Paolo Linda

libar adi.
(li-bar)

Che nol à impegns sentimentâi

sinonimi

disponibil

esempi

"parcè no ti cjatistu une fantate libare? A 'ndi è tantis pal mont"

da "I forescj" di Alan Brusini, Gian Paolo Linda

libar adi.
(li-bar)

Che nol à cualchi carateristiche, element, compuartament e v.i., spec. negatîfs

sinonimi

franc

esempi

"chescj a son i numars di mape, al catast o ai viodût che a son in dite juste e la robe e je libare di impotechis"

da "Interès malandret" di Pieri Somede dai Marcs

"un salustri libar di ogni rivoc fastidiôs"

da "La tiere di Lansing" di Maria Forte

"a volevin prontâ repertoris universâi, e di utilitât universâl, e duncje libars di costrizions linguistichis"

da "Il brevet" di Mario Turello

libar adi.
(li-bar)

Che nol è improibît o limitât

sinonimi

esent, franc

esempi

"prodots in vendite libare"

libar adi.
(li-bar)

Cence paiament

sinonimi

a gratis, gratis, sore nuie, franc

esempi

"la jentrade aes iniziativis e je libare (a tacaran dutis aes 9 di sere [...] )"

da "Une balade par Carnera" di Erika Adami

libar adi.
(li-bar)

Che nol à limitazions imponudis o concuardadis

esempi

"lavorâ cun orari libar"

libar adi.
(li-bar)

Che nol è insuazât in maniere fisse o che nol rispiete schemis precîs

esempi

"La Divine Comedie [...] e je stade voltade [...] in prose, in viers libars, o ancje in tercinis cun rime incjadenade propit come tal origjinâl"

da "Note dal curadôr ae traduzion dal Infier di Dante" di Sandri Carrozzo

""USGNOT... NO!" Traduzion libare gjavade di "No sex, please. We are british""

da "Invît a Tatri" di Aministrazion Publiche

libar adi.
(li-bar)

Di puest, sente, turni e sim., no ocupât di altris

sinonimi

disponibil, vueit

esempi

"si alçà, al vignì a dâmi la man e mi mostrà une cjadree libare"

da "Un de maiorance" di Agnul di Spere

libar adi.
(li-bar)

No intrigât o impedît tal so spazi o te sô funzion

esempi

"e viodeve un mûr di cuarps denant di se, di là dal passaç che la spaltade e mantignive libar"

da "Te grande place" di Agnul di Spere

libar s.m.
(li-bar)

[TS] (sport) Intal balon, difensôr che nol à compits di marcadure

esempi

"Ivano Blason di Sant Lurinç, presint tal 1950 in Brasîl, il prin libar dal Padue dal Paron Nereo Rocco"

da "Ducj i furlans che a àn fat onôr ae Nazionâl" di Andrea Tommasin

libar s.m.
(li-bar)

[TS] (sport) Intal volleyball o bale a svol, zuiadôr che al pues jentrâ in cjamp inte linie difensive in cualsisei moment de partide cence bati o fracâ

monolingue