SuperDizionari

pacjific adi., s.m.
(pa-cji-fic)

Che, cui che al cîr la pâs e al sta lontan de violence

esemplis

"o crôt che in nissune part dal mont si cjati popui plui pacjifics dal nestri. Di pacjifics compagn, ancje ancje; ma di pacjifics di plui, impussibil"

gjavât fûr di "I furlans e la pâs" di Riedo Pup

Viôt ancje: pacific

pacjific adi.
(pa-cji-fic)

In pâs, cence vuere

sinonims

cuiet

esemplis

"une forme di convivence pacjifiche e produtive"

gjavât fûr di "La sgarfade dal cjan" di Josef Marchet

"[la decolonizazion] par chel che s'inten Ceylon e fo dut afat pacjifiche, tratantsi di une vore menade indenant di Londre"

gjavât fûr di "In viaç sui confins de tiere splendint" di Mainardo Benardelli

pacjific adi., s.m.
(pa-cji-fic)

Che, cui che nol à pinsîrs o dafâs che lu pressin, che al pues stâ cence preocupazions e ancje cence fâ nuie o fasint lis robis cun calme

sinonims

bonat, bonpaston, calm, cuiet, pacheôs, pacjoc, panzel, pasât, paston, seren

esemplis

"al jere Istât, e la int e beveve bire stant sentade pacjifiche fûr dai ristorants"

gjavât fûr di "Un cidinôr todesc" di Agnul di Spere

"jo i sieri il puarton, o puarti vie la clâf cun me e tu tu jentris par daûr; cussì tu stâs plui pacjifiche e no tu stâs in pinsîr"

gjavât fûr di "Il sium di Lissandri" di Franca Mainardis

pacjific adi.
(pa-cji-fic)

Che al è sigûr e evident (fig.)

sinonims

ciert, fûr di discussion, fûr di dubi, sigûr, clâr, positîf, palês

esemplis

"ce lenghe sielzi par tirâ sù i fîs? Almancul in teorie, al è un fat avonde pacjific se i gjenitôrs a son furlans. Tresinte 25 personis (71,7%) a disin "il furlan"; ma 28% a son contraris"

gjavât fûr di "Tirie dilunc la vierte autonomistiche?" di Luche Nazzi

monolengâl