SuperDizionari

monolengâl

re s.m.

Cui che al ten la autoritat plui alte intune comunitât politiche indipendente o une vore autonome, titulâr par dute la vite di un podê che nol è assegnât dal popul, ma de sucession ereditarie, de volontât divine, de tradizion, e v.i.

sinonims

maestât, monarcje, sovran

esemplis

"i prins di Avrîl dal 568 a rivarin a Cividât e li lôr re Alboin al stabilì come duche so nevôt Gjisulf"

gjavât fûr di "Cuintristorie dal Friûl fin sot la Italie" di Josef Marchet

"un re al veve dome une fie e jê e i voleve ben dome al stalîr. Si volevin tant ben che al jere dibant fâle sposâ cuntun re"

gjavât fûr di "Chê de principine" di Andreina Nicoloso Ciceri

re s.m.

Cui o ce che al à buinis cualitâts o che al è chel miôr, chel plui cognossût, plui preseât e v.i.

esemplis

"il Rusignûl, il re dai cjantôrs, dopo vê zornât dut il dì, i dâ sot ancje di sere e di gnot"

gjavât fûr di "Mestris cjantôrs" di Alan Brusini

re s.m.

[TS] (zool.) Mascli che al è fecont tes coloniis di Isotars

re s.m.

âf feconde che e je il riferiment di une famee di âfs, (impropr.)

esemplis

"[lis âfs semenadis] dutis daûr al lôr re, a si tacarin daprûf di un vôl, une parsore la altre, come un grant codâr"

gjavât fûr di "Lis âfs" di Catarine Percude

re s.m.

[TS] (zûcs) Figure di valôr plui alt dal stes colôr tes cjartis di zûc, de serie di dîs o di tredis

esemplis

"un doi trê / fant cjaval e re"

gjavât fûr di "Sacheburache" di Zuan Nazzi Matalon, Ottorino Burelli

"butâ il re di baston"

re s.m.

[TS] (zûcs) Toc che tal zûc dai scacs al à il valôr plui alt che e al è l'obietîf de concuiste dai zuiadôrs

esemplis

"il re al pues movisi in dutis lis direzions [...] ma dome une casele par volte"

gjavât fûr di "Zuìn di scacs" di Nilde Teresa Negro

detulis

"balçan di trê, cjaval di re; balçan di un, cjaval di nissun"

"dulà che nol è nuie il re al piert i siei dirits"

torne sù