SuperDizionari

sacri adi.
(sa-cri)

Che al rivuarde o che al à a ce fâ cun Diu o cu lis divinitâts, che si riferìs ae religjon e al cult

sinonims

consacrât, sacrâl, sacrât, sant

esemplis

"sacri al è ogni sît che li si à contat cul divin. Sacre e je ogni robe che e realize chel contat, inte celebrazion o inte preiere"

gjavât fûr di "Viaç aes origjins dal Logos" di Adrian Cescje

"par antîc, chês gleseutis sul fâ de nestre, a vevin di jessi dutis pituradis cui fats de storie sacre o de vite di Crist"

gjavât fûr di "Lis predicjis dal muini" di Josef Marchet

sacri adi.
(sa-cri)

Consacrât a di une divinitât

sinonims

avodât, dedicât, sacrât

esemplis

"il tei al è sacri a Afrodite"

"[la fuee di puliole] e vignive doprade par curâ la gote e par chest e jere sacre di Sant Gjerart"

gjavât fûr di "Jerbis salvadiis inte cusine furlane" di Giorgio Pascoli

sacri s.m.
(sa-cri)

Dome sing., ce che al rivuarde la divinitât e la religjon

sinonims

divin, sacrât

esemplis

"intune armonie di sacri e di profan [...] la fieste de Epifanie e devente une vecje che e rive dute nere, cun grumâi e grumalons"

gjavât fûr di "Faliscjis" di Cristina Noacco

"ancje se i sintiments religjôs e lis esperiencis dal sacri no si fermin dome su la cuistion de muart, nol è dubi che cheste esperience e je centrâl inte dimension religjose"

gjavât fûr di "Il cjâf dai furlans" di Franc Fari

sacri adi.
(sa-cri)

Che al à di jessi venerât e rispietât (fig.)

sinonims

meritori, sacrât, sant, venerabil

esemplis

"cetantis bufulis che nus àn contadis sul cont de democrazie, su la nature sacre des leçs, su la grande e nobile mission di cui che lis met adun"

gjavât fûr di "L'esempli di adalt" di Josef Marchet

"[la libertât] che un popul al à il dovê di conservâ come ereditât sacre cuintri lis gnovis barbariis"

gjavât fûr di "La cjase di Toni" di Tarcisio Venuti

"se e je vere che la vite e je sacre, e à di jessi sacre simpri e no a bugadis"

gjavât fûr di "I furlans e lis Falkland" di Riedo Pup

sacri adi.
(sa-cri)

Che al è calcolât une vore impuartant, di tignî ben, di no podê rinunziâ e v.i. (scherç.)

sinonims

che no si tocje, intangjibil, sacrât, sant, santissim

esemplis

"guai puartâ dentri robis su la machine di gno pari che a puedin in cualchi forme sporcjâle, come lens, blave o modons. La machine dal papi e je sacre"

gjavât fûr di "Sul florî" di AAVV

monolengâl