SuperDizionari

monolengâl

savôr s.m.
(sa-vôr)

Sensazion dade di ce che si mangje e di ce che si sint cu la lenghe

sinonims

gust

esemplis

"al veve indolcît il cafè; infin, cu la bocje plene di aghegole, lu veve bevût, pacjant tal ultin par che i restàs in bocje chel bon savôr"

gjavât fûr di "Aiar di cjase" di Franca Mainardis

"la lidrîs mestre [dal cren] si dopre crude gratade fine par fâ une salse sauride di compagnâ cun cjar bulide e no tant fuarte di savôr"

gjavât fûr di "Jerbis salvadiis inte cusine furlane" di Giorgio Pascoli

"i luvins a deventarin une plante salvadie, mare di savôr, cence sostance"

gjavât fûr di "La maledizion dai luvins" di Catarine Percude

savôr s.m.
(sa-vôr)

Impression fate di une cierte esperience, persone, robe e v.i. (fig.)

sinonims

gust

esemplis

"chês robis antighis che a vevin il savôr de maravee, la scuvierte che i fruts a fasin dal mont"

gjavât fûr di "Par stradis lungjis" di Alan Brusini

"Zuan al comprà altre tiere dai Zanins. Ogni an un cjamp gnûf; ma, a pene so, al jere come se al ves mudât savôr"

gjavât fûr di "La tiere di Lansing" di Maria Forte

savôr s.m.
(sa-vôr)

Complès dai aspiets che a caraterizin alc o cdn., che lu fasin jentrâ intune cierte categorie, che i dan une cierte identitât e v.i. (fig.)

sinonims

gust, stîl, ande, fate

esemplis

"“O dîs - al sentenzie une volte pre Checo cuntune espression di savôr biblic - che il malan e la disgracie che a vegnin te storie une vore di voltis nol è mâl: al è un ben che al vignarà fûr dopo...”"

gjavât fûr di "Pre Checo e la storie" di Gian Carlo Menis

"lis televisions a assegnavin ae lenghe furlane un puest margjinâl tal lôr menù di servizis, simpri che le doprassin, par contignûts di savôr localistic"

gjavât fûr di "Memoriis di politiche linguistiche" di Adrian Cescje

savôr s.m.
(sa-vôr)

Cualitât di ce che al è vîf, ferbint, interessant e v.i. (fig.)

sinonims

anime, calôr, vivôr, gust

esemplis

"zovins cussì discompagns dai contadinots cence spirt e savôr che e veve cognossût fin in chê volte"

gjavât fûr di "Cjase di Dalban" di Maria Forte

"si sa che tra parincj lis rifis e i svindics ti àn plui savôr"

gjavât fûr di "Come tai romançs" di Alan Brusini

"cuant che si fâs un compromès fra ce che si è e ce che si varès di jessi, e rive timp o tart la muart, si smamìs dut, al piert savôr dut"

gjavât fûr di "La Glesie e à di lassâ i popui come che a son e fâur di levan seont la lôr paste" di Francesc Placerean

detulis

"amôr al à un grant savôr"

"cjar lavade e piert il savôr"

"cui che al vûl savê masse al sa di chel savôr che mi capîs"

"di chel len al è, di chel savôr al sa"

"e je la ultime gote chê che a lasse il savôr in bocje"

"il vin si lu cognòs tal savôr e il pan tal colôr"

"la bote e da di chel savôr che e à"

"la fam i da bon savôr al pan"

"ogni plat il so savôr, ogni man il so lavôr"

"passât il glotidôr, passât ogni savôr"

"sore sâl nol è savôr, sore diu nol è signôr"

"studât il lusôr a àn ducj chel savôr"

torne sù